“Marjus Djerri dhe Edi Bokrina, nga ana tjetër, ishin në furgonin Qubo të EuroPulizia. Duhej të shkonin në punë në një kompani në Rapallo. U nxorën nga rrënojat para mamasë, babait dhe grave të tyre”, shkruajnë mediat italiane, duke konfirmuar kështu edhe vdekjen e shqiptarit të dytë në tragjedinë e Genovas.
Marjus Djerri është 22 vjeça nga Shijaku, ndërsa Edi Bokrina mendohet se është nga Shkodra. Të dy kanë qenë duke udhëtuar me makinë për të shkuar në punë, por janë gjendur në vendin e gabuar në kohën e gabuar. Fatkeësisht të dy humbën jetën. Lajmi është konfirmuar edhe nga ambasada jonë në Itali.
Shqiptari tregon katastrofën e Xhenovas 
Ervini nga Tirana ishte me fat, sepse i shpëtoi mrekullisht tragjedisë së djeshme në Itali. Djaloshi 29 vjeçar nga Tirana, por që prej 5 vitesh jeton në Xhenova të Italisë, ishte dëshmitar i asaj tragjedie që ndodhi dje paradite kur një pjesë e urës Morandi u shemb duke shkaktuar deri tani mbi 30 të vdekur.
Ai tregon për redaksinë e Ora News minutat që e kanë ndarë nga vdekja.
“Kisha marrë disa materiale nga magazinën ku punoj, vetëm 10 metra larg urës Morandi në Genova të Italisë për t’i transportuar me furgon në destinacion e duhur.
Do të kaloja autostradën. Ishte ora 11:40 minuta. Binte një shi i rrëmbyeshëm dhe pamje ishte shumë e mjegulluar. Sapo kalova 300-400 metra dëgjova një zhurmë të madhe. Ndalova makinën dhe hapa xhamin. Pashë që ura po rrëzohej dhe makinat fluturonin në ajër. Nuk e besova sepse dhe shiu ishte shumë i rrëmbyeshëm. Ura iku u shemb poshtë brenda pak sekondash ndërsa makinat ishin në fluturim”
I pyetur nëse ka dëgjuar që mund të ketë shqiptarë të prekur nga kjo tragjedi, Ervini tregon: Kur u ktheva në magazinë një orë e gjysmë më pas pashë disa familjarë që po pyesnin rreth e rrotull për një djalë të tyre. Nuk po arrinin të komunikonin në telefon dhe kishin frikë mos ai kishte udhëtuar me makinë në autostradë në momentin e tragjedisë, por nuk di më nëse familja arriti të gjente djalin. Unë vetë nuk kam dëgjuar tjetër. As mediat italiane që po ndjek nuk kanë thënë gjë deri tani”.
