Shqiptarët po preken gjithnjë e më shumë nga sëmundjet që lidhen me hipertensionin, sipas Observatorit Global të Shëndetit. Vendi ynë është në zonën e rrezikut në mesin e vendeve që kanë prevalencën më të lartë në të gjithë Europën. Sëmundja që ka si shkak stilin e jetesës ka prekur më së shumti vendet ish-komuniste, që sot cilësohen si ekonomitë e tranzicionit.
Sipas Observatorit, në Shqipëri rreth 32 për qind e popullsisë mbi 18 vjeç është e prekur nga tensioni i lartë i gjakut. Nivelin më të ulët të sëmundshmërisë shihet ta ketë Britania e Madhe me 21 për qind të popullisë mbi 18 vjeç, ndërsa nivelin më të lartë e ka Estonia me 38 për qind të popullsisë së rritur të prekur.
Instituti i Shëndetit Publik në një raport të posaçëm për shëndetin e popullatës argumenton se niveli i vdekshmërisë nga sëmundja ishemike e zemrës që i atribuohet hipertensionit është rritur dy herë në Shqipëri gjatë 20 viteve të fundit, kurse niveli i vdekjeve nga sëmundjet cerebrovaskulare për shkak të hipertensionit arterial është rritur me më tepër se 70%.
Vdekshmëria nga sëmundja ishemike e zemrës që i atribuohet hiperkolesterolemisë pothuajse është dyfishuar në Shqipëri, i cili është i vetmi vend në rajonin e Evropës Juglindore që po kalon një rritje graduale të barrës së sëmundshmërisë që i atribuohet nivelit të lartë të kolesterolit total.
Sipas të dhënave të Barrës Globale të Sëmundjeve, hipertensioni arterial ishte faktori i dytë i rrezikut, shkaktar për pjesën më të madhe të barrës së sëmundjeve në Shqipëri vitet e fundit, pas faktorëve të rrezikut të lidhur me dietën.
Prevalenca e hipertensionit arterial ishte më e lartë tek individët më të rritur (45-49 vjeç), ku 40% e femrave dhe 45% e meshkujve në këtë grupmoshë kishin hipertension.
Më tej, 80% e femrave dhe 90% e meshkujve me hipertension nuk ishin të vetëdijshëm për gjendjen e tyre. Një studim i bazuar në popullatën i kryer në Tiranë në vitet 2000, që përfshiu një kampion përfaqësues meshkujsh dhe femrash të moshës 35-74 vjeç, tregoi se prevalenca e vetëraportuar e hipertensionit arterial ishte 15% te meshkujt dhe 19% te femrat.
Sipas vlerësimeve të 2010, niveli i përgjithshëm i vdekshmërisë që i atribuohet tensionit të lartë të gjakut në Shqipëri ka pasur një rritje domethënëse gjatë njëzet viteve të fundit.
Niveli i vdekshmërisë nga hipertensioni nga 135 për 100 mijë banorë në vitin 2003 arriti në 245 vdekje për 100 banorë në vitin 2010.
