“Rezultatet e reformave do të vijnë. Mjafton t’u jap një shembull shumë të thjeshtë për ta mbyllur. Për herë të parë në historinë e vet, në muajin prill OSHEE–ja ka dalë me fitim (duartrokitje). Çfarë do të thotë kjo? Do të thotë që për herë të parë në historinë e vet OSHEE–ja nuk ka nevojë të kërkojë para nga taksat për të mbuluar gropën që hapet nga vjedhjet”.
Kjo deklaratë është bërë nga kryeministri Edi Rama më 4 maj të vitit 2015 në fushatë elektorale. Para një grupi simpatizantësh ai dha sihariqin se ky ishte rezultati pozitiv i një prej reformave më të debatueshme në vend.
Por a janë këto që thotë kryeministri bilancet reale të OSHEE?
Kontrolli i Lartë i Shtetit ka zbuluar një anë të errët e tyre. OSHEE mund të ketë dalë me fitim siç thotë kryeministri, por ajo i ka KESH–it plot 370 milionë euro borxhe. Dhe ky borxh është i përllogaritur deri më datën 20 shtator 2016.
Nga një inspektim i Kontrollit të Lartë të Shtetit rezulton se OSHEE dhe OST janë larg realizimit të objektivave për të krijuar një sistem të qëndrueshëm energjetik me aftësi likuiduese.
KLSH thotë se OSHEE i detyrohet KESH-it 50.9 miliardë lekë ose 370 milionë euro.
Detyrimi i OSHEE ndaj KESH për blerjen e energjisë elektrike është 50.9 mld lekë (370 mln euro).
Detyrimi OSHEE ndaj KESH për huatë afatgjata është 11.3 mld lekë.
Detyrimi i OSHEE ndaj OST për transmetim energjie, shërbime dhe kredi është 8.2 mld lekë.
Në total, detyrimi total i KESH, OSHEE dhe OST, deri më datën 20 shtator 2016, është 80.6 miliardë lekë.
Qeveria Rama ka kohë që kërkon t’u tregojë shqiptarëve se reforma e saj në energjetikë ishte e suksesshme. Dhe në krye të sukseseve rendit OSHEE, një ndërmarrje që është akuzuar vazhdimisht nga opozita për vjedhje dhe abuzime me tenderat.
Për të reformuar sistemin energjetik, pak muaj pasi erdhi në pushtet, qeveria Rama mori 150 milionë euro borxh nga Banka Botërore.
