Kreu i Opozitës Lulzim Basha ka përcjellë pas vdekjes së ish Presidentit Amerikan Bush një mesazh ngushëllimi për familjen e tij.
“Mendimet e lutjet e mija janë me familjen Bush dhe popullin amerikan”, shkruan Basha. “Shqiptarët do ti jenë përjetë mirënjohës për mbështetjen vendimtare për demokracinë në Shqipëri dhe sigurinë në Kosovë”.
Ja postimi i plotë i Bashës:
Lajm i hidhur ndarja nga jeta e ish Presidentit të SHBA George H.W. Bush. Shqiptarët do ti jenë përjetë mirënjohës për mbështetjen vendimtare për demokracinë në Shqipëri dhe sigurinë në Kosovë.
Mendimet e lutjet e mija janë me familjen Bush dhe popullin amerikan. U prehtë në paqe!
Gjatë një periudhe të re që filloi më 20 janar 1989, Presidenti Bush u gjend në krye të superfuqisë së vetme të mbetur në botë. Muri i Berlinit ra; Bashkimi Sovjetik pushoi së ekzistuari; blloku komunist në Europën Lindore u shkatërrua; Lufta e Ftohtë kishte marrë fund.
Diplomacia e tij e fuqishme por e përmbajtur ndihmoi që këto ngjarje të kalonin në paqe dhe harmoni në skenën botërore.
Në dhjetor 1992, George H. W. Bush nxori të ashtuquajturin “paralajmërim të Krishtlindjeve”, një letër drejtur udhëheqësit të Serbisë Sllobodan Millosheviç, në të cilën thuhej se në rast të një konflikti në Kosovë të shkaktuar nga veprimi serb, SHBA do të jenë gati të përdorin forcën ushtarake.
Pavarësia e Kosovës u realizua nën presidencën e djalit të tij George W. Bush në shkurt 2008.
