Shoqata Antikomuniste e të Përndjekurve Politikë të Shqiperisë ka denoncuar përpjekjet e individëve që i kanë shërbyer diktaturës komuniste dhe organizmave të krijuar prej tyre për të penguar e sabotuar realizimin e një prej te drejtave e kërkesave tona kryesore, gjetjen e trupave të të zhdukurve nga diktatura komuniste.
Kryetari i Shoqatës Antikomuniste të të Përndjekurve Politikë, Nebil Çika në një deklaratë publike shkruan se, kjo është një përpjekje e hapur për të zhdukur provat e krimeve të komunizmit në Shqipëri, pasi dihet parimi universal juridik qe pa trup nuk ka krim.
“Në bazë te ligjit për çdo trup të gjetur prokuroria është e detyruar të nisë hetimet gjë që do të çojë ne zbulimin e shkakut te vdekjes dhe autorëve të tyre. Kjo ka qene arsyeja pse qeveria e shteti ne konflikt interesi kane bllokuar deri tani procesin e gjetjes se eshtrave te familjarëve tanë të zhdukur nga komunistët”, shkruan ndër të tjera Çika.
Deklarata e plotë
Ne Shoqata Antikomuniste e të Përndjekurve Politikë të Shqipërisë protestojmë ndaj përpjekjeve te individëve qe ia kane shërbyer diktaturës komuniste dhe organizmave te krijuar prej tyre për te penguar e sabotuar realizimin e një prej te drejtave e kërkesave tona kryesore, gjetjen e trupave të të zhdukurve nga diktatura komuniste.
Ka kohe që po synohet ndërtimi i një varreze false (pa eshtra) të te zhdukurve nga diktatura komuniste, pushkatuar, te vrarë në kufi, të vdekur nga torturat në hetuesi e burgje, trupat e te cilave nuk iu janë dhëne familjareve. Qëllimi është që të sabotohet e të pengohet procesi i gjetjes se tyre, një detyrim ligjor kombëtar dhe ndërkombëtar i qeverise dhe shtetit shqiptar.
Kjo është një përpjekje e hapur për të zhdukur provat e krimeve të komunizmit në Shqipëri, pasi dihet parimi universal juridik qe pa trup nuk ka krim. Në bazë te ligjit për çdo trup të gjetur prokuroria është e detyruar të nisë hetimet gjë që do të çojë ne zbulimin e shkakut te vdekjes dhe autorëve të tyre.
Kjo ka qene arsyeja pse qeveria e shteti ne konflikt interesi kane bllokuar deri tani procesin e gjetjes se eshtrave te familjarëve tanë të zhdukur nga komunistët.
Me përpjekjen tonë të vazhdueshme gjetja e të zhdukurve ka marrë përmasa ndërkombëtare. Aktualisht në Shqipëri po vepron ICMP (organizata ndërkombëtar e gjatjes së të zhdukurve) ndërkohë që në progres raportin e BE për Shqipërinë kjo është shtuar si çështje që duhet te zgjidhet.
Të vënë në presion kombëtar dhe ndërkombëtar individë e organizma në konflikt interesi me gjetjen e të zhdukurve kanë gjetur si zgjidhje artifica kriminale si ky propozim për ngritjen e një varreze false që do te përdoret si justifikim , brenda e jashtë vendit, për ndalimin dhe sabotimin e gjetjes se eshtrave te njerëzve tanë te zhdukur.
Fakti që këto propozime vejnë e mbështeten nga individë qe nuk kanë asnjë lidhje gjaku me te zhdukurit e për me tepër i kane shërbyer drejtpërdrejtë diktaturës komuniste i bën edhe më kriminale këto përpjekje kundër një te drejte legjitime tonën për te pasur një varr për nderuar e lutur për njerëzit tanë te zhdukur nga komunistet.
Ne dënojmë me neveri përpjekje te tilla kriminale qe i konsiderojmë vazhdimësi të vrasjeve e zhdukjes se njerëzve tanë nga komunistet .
Me keqardhje vëmë re që kësaj iniciative kriminale i janë bashkuar edhe drejtues te komunitete fetare, ndoshta te pa informuar për qëllimin e autorëve te sajë. Në këto kushte i bëjmë thirrje drejtuesve te fesë, politikes, shoqërisë civile, medias të mos bëhem pjesë e kësaj maskarade te vazhdimësisë se krimit komunist në Shqipëri.
Te drejtën për të vendosur çfarë do te behet me eshtrat e të zhdukurve e kemi ne familjarët e tyre jo sharlatanët e organizatave kriminale të masave te PPSH dhe spiunet e Sigurimit të Shtetit.
Ne jemi të vendosur të gjejmë trupat e të nderojmë familjaret tanë të zhdukur nga komunistët dhe nuk do lejojmë ata dhe kedo që do të pengojë e te sabotojë këtë të drejte tonë ligjore e hyjnore.
