Deputetët e opozitës kanë kundërshtuar rritjen e taksës së pronës, për të cilën kanë shprehur rezerva se nuk është konsultuar me pushtetin vendor. “Neni 4 duhet të ndryshojë totalisht sepse është neni që cenon autonominë financiare, cenon autonominë vendore, aq më tepër i gjithë ligji në tërësi, por neni 4 duke vendosur nivelet e pasurive, që ta dinë qytetarët nga neni 1 deri te i fundit është ligji që rrit taksat e pronës së qytetarëve dhe përcakton taksat e pronës të të gjithë qytetarëve për pasuritë e paluajtshme dhe tokat bujqësore. Sot qytetarët janë edhe më të varfër ata nuk mbajnë dot familjen, jo më të paguajnë taksë të dytë dhe të tretë për pasuritë apo për tokat bujqësore që ata kanë”, thotë Dhurata Çupi, deputete e PD. Ndërsa deputeti i LSI, Nasip Naço theksoi se janë hequr ato taksa që kanë të bëjnë edhe me shtresën e pasur, ku qeveria nuk mendon ndonjëherë për shtresën e varfër dhe sigurisht për këto arsye nuk ka për ta votuar. “Nuk e kam votuar nenin 4 sepse nuk parashikon rritje të pensioneve për të gjithë ata qytetarë që janë në një moshë që kanë nevojë për kujdesin e shtetit. Keni vetëm një indeksim dhe për këtë arsye nuk e kam votuar nenin 4. Sigurisht që ju po trumbetoni që do të jemi fuqi ekonomike në rajon, është buxheti më i mirë. E kemi parë edhe nen për nen që keni hequr ato taksa që kanë të bëjnë edhe me shtresën e pasur, nuk mendoni ndonjëherë për shtresën e varfër dhe sigurisht për këto arsye nuk kam për ta votuar”, thotë Nasip Naço, deputet i LSI.
