Mbetet mister humbja e sendeve personale të efektivit të Anti-drogës Florian Pema, i cili në 20 nëntor humbi jetën në Spitalin Infektiv nga Covid-19. Një javë pas ndarjes nga jeta, bashkëshortja Valbona denoncoi në komisariatin numër 4 se i kishin marrë sendet.
Një muaj pas këtij denoncimi, “ABC” mëson se ende nuk ka të dhëna se kush mund t’i ketë marrë ato. Kanë humbur portofoli me një shumë parash, dokumentet e identifikimit si dhe disa fotografi.
Në dëshminë e saj, Valbona kërkoi se sendet e Florianit donte ti ruante si një kujtim të çmuar.
Policia referoi rastin në Prokurori. Me anë të një shkrese zyrtare i kërkoi informacion drejtorisë së Spitalit Infektiv dhe morgut të kryeqytetit.
Në përgjigjen e marrë nga Infektivi, thuhet se 3 qeset me rroba e veshmbathje të Florianit i janë dorëzuar familjarëve.
Ata thonë se Floriani pasi është transportuar nga pavioni Infektiv në Reanimacion, kishte vetëm aparatin celular dhe karikusin.
Drejtoria e spitalit ka thënë se nuk kishin mbajtur asnjë procesverbal për sendet personale të efektivit. Ndërsa në përgjigjen e kthyer nga morgu, thuhet se spitali nuk u ka dorëzuar asnjë send personal të viktimës.
Pavarësisht se ka nisur hetimet, prokuroria dhe policia nuk kanë marrë në pyetje asnjë nga mjekët apo personel të morgut./ Abcnews
