Një sërë pyetjesh publike ka ngritur ish-Kryeministri Berisha për informacione të reja që vijnë nga dosja e drogës Rama-Tahiri-Habilaj. Por për asnjërën prej tyre nuk ka marrë përgjigje dje në Parlament, ndonëse Rama ishte vetëm pas krahëve të tij. Në vend të përgjigjesh për lidhjet e bandës së drogës me Tahirin, Berisha ka marrë si përgjigje prerjen e fjalës nga Ruçi.
Sipas informacioeve të pakonfirmuara në makinën me 863 mijë eurot ka qenë vetë Tahiri, ndërsa lidhjet e tij me Sotën janë të provuara edhe nga videot e festave familjare mes tyre.
“E keni shndërruar këtë Parlament.., për respekt të zonjave këtu unë nuk po e them, por merreni me mend vetë këtë fjalë. Dilni e filloni me hipokrizira vetëm për të mbuluar Tahirin. Të nderuar qytetarë, a tha ky njeri se ska patur dijeni? A u publikuan raporte sipas të cilave SHIK e kishte informuar për 127 oficerë madhorë të policisë që merreshin me mbjelljen dhe trafikun e drogës? A tha Tahiri se nuk e njihte Orest Sotën? Pa shkoni merrni pak videon e ditëlindjes së tij në lokalin e kunatit se si hedh vallen Oresti, si krushk i parë aty”, tha Berisha.
Ish-Kryeministri ka denoncuar një tjetër fakt që tregon lidhjet e Ramës me bandën e drogës së Habilajve të Tahirit. Spartak Braho ka shkuar me urgjencë tek kreu i Policisë së Elbasanit të nesërmen e kapjes së makinës me 863 mijë euro? Përse duhej që Rama të niste menjëherë korrierin e tij drejt Elbasanit?
“Pa na thuaj pak për ça e çove Spartak Brahon të nesërmen e kapjes së parave, tek drejtori Policisë, Qato. A e dini se thonë që në makinë me Sotën ka qenë vetë Saimir Tahiri? A e morët vesh se ka çuar Agaçion për t’i nxjerrë në Katania dokumentin e falsifikuar. Po ore po, po Balili të ka në grusht ty. Videon e orgjive të tua në Santa Quaranta ja ka dërguar të gjithëve”, tha Berisha.
Përmbytja dhe çfarë ndodhi me By Pass-in e Shkodrës
Në mënyrë akrobatike, për t’i ikur debatit për përmbytjen e fundit në vend, Rama është hedhur tek përmbytjet e 6 viteve më parë në Shkodër. Kjo ka sjellë replika mes Ramës dhe ish-Kryeministrit Berisha për atë që ka ndodhur me By Pass-in e Shkodrës.
“Përsëri jam tek çështja që ngriti këtu, në mënyrën më absurde dhe idioteske. Jo për të bërë Kasandrën, por kjo që pamë me Vjosën është lule nga ç’mund të shohim nga përmbytjet në këtë vend. Sado që ishte përmbytje e egër, por vendi ka zona të tjera, njëra prej tyre është Vjosa, e përmbytjeve më të mëdha në rajon. Për atë By Pass-in që e ke kapur për shkak të xhepit tënd, po ju them ju dhe qytetarëve të Shkodrës. Shkodra përjetoi gjatë mandateve të qeverisë tonë tre përmbytje. Njëra prej tyre po shkonte thuajse drejt apokaliptikes, sepse në njërën prej tyre, në pothuaj gjysmën e qytetit ujërat arritën deri në 2 metra lartësi. Dhe dije o injorant, që nuk u hapën digat, se digat e shpëtuan Shkodrën nga apokalipsi. Sepse Shkodra u përmbyt nga liqeni, sepse liqeni mblidhte nga alpet e Malit të Zi të Shqipërisë, jo të Drinit, 9000 metër kub në sekondë. Kurse Liqeni i Fierzës ishte nën kuotë, ato e mbrojtën deri në fund të asaj jave. Se po të mos ishte liqeni dhe po të hapeshin portat, e cila është e detyrueshme, hapja e portave është detyrë sine qua non e autoriteteve, Shkodra do të njihte një gjëmë të madhe. Por falë mobilizimit të shkëlqyer të atij kryetari bashkie (Lorenc Luka), Shkodra nuk pati asnjë viktimë. Vijmë te diga. Janë marrë në Shqipëri tre grupe, më të shquarat në Europë për ujërat. Sollën në Shqipëri kryeinxhinierin e ujërave të Holandës. Qeveria britanike nëpërmjet një kompanie solli këtu ish-presidentin e digave të Britanisë së Madhe. Italia mike solli gjithashtu autoritetin kryesor të digave për këto probleme. Ti je një njëri që sdi as çështë diga, as çështë uji, as çështë qeverisja, di vetëm të vjedhësh dhe të gënjesh nga mëngjesi deri në darkë. Ka konkluzione nga ata, dhe në këto konkluzione dy ishin jetike. E para, ndërtimi i asaj që t’i quan digë, By Pass-i pra, dhe që i ke ndërprerë dhe financimin. Ndërtimi i saj ishte kushti i kushteve për të mbrojtur Shkodrën nga mbytja që mund t’i sjelli liqeni. Shko merr të dhënat. Liqeni fryhej çdo ditë me disa centrimetra. By Pass-i, sipas tre grupeve kryesore ishte e vetmja mënyrë për të mbrojtur në shkallën më të lartë përmbytjen nga liqeni. Dhe për shkak të lartësisë që By Pass-i fiton edhe në hyrje të Shkodrës për t’u përmbytur nga fryrja e Bunës. Çfarë bëre? Erdhe dhe ndërpreve financimin në aktin më të parë. By Pass-i Shkodrës, i cili shkon nga 40-60 milionë euro me gjitha sistemin e pompave dhe sistemin tjetër, s’është aspak një vepër e preferueshme. By Pass-i Shkodrës, në projektin e parë nuk ishte digë, por ishte thjesht një autostradë që anashkalonte Shkodrën dhe e lidhte me Hanin e Hotit nga hyrja e Shkodrës. By Pass-i u shndërrua në digë, sepse ky ishte sugjerimi i tre grupeve të fuqishme për të mbrojtur Shkodrën. T’a dinë shkodranët se përveç mbajtjes së argjinaturave ekzistuese, ne kishim thellimin e Bunës. Jo, thanë ata, thellimin e Vilunit. Sugjerimi tretë ishte heqja e pengesave që janë në fillim te Buna. Këto tre masa, merr raportin po ti s’di të lexosh. Çështja e përmbytjeve është një çështje shumë e rëndësishme, është jetike. Mos luaj me Shkodrën, sepse Shkodra është nën rrezik më shumë se çdo qytet tjetër në Ballkan për përmbytjet”, tha Berisha.
