Një automjet, i cili ka qenë në lëvizje e sipër, në aksin rrugor Milot-Burrel, ka marrë flakë dhe është djegur pothuajse plotësisht. Ngjarja ka ndodhur rreth orës 13:40, të ditës së djeshme, ku sipas shërbimeve të policisë dhe grupit hetimor në vendin e ngjarjes, konkretisht në vendin e quajtur “Kongrazhd”, ka qenë një automjet tip “Range Rover”, me drejtues shtetasin A.K, 32 vjeç, banues në Peshkopi. Drejtuesi i automjetit në përpjekje për të shuar flakët ka marrë dëmtime të lehta sipërfaqësore në njërën dorë.
Shërbimet e policisë e kanë transportuar në Spitalin e Burrelit, për të marrë ndihmë mjekësore, ku pas marrjes së ndihmës së parë është larguar nga Spitali. Drejtuesi i automjetit po udhëtonte i vetëm në automjet.
Nga veprimet e kryera dhe nga deklarimet e drejtuesit të mjetit rezulton se shkaku i rënjes së zjarrit në automjet ka ardhur si pasojë e një shkëndije elektrike në sistemin elektrik të mjetit. Për të gjitha veprimet e kryera është komunikuar me Prokurorin e gatshëm, dhe materialet proceduriale do t’i kalojnë Prokurorisë së Rrethit Gjyqësor Mat, si “Ngjarje Aksidentale”.
