Përçarje e thellë mes Holandës dhe Turqisë

“Ne nuk arritëm të biem dakord për normalizimin”: Haga tërheq zyrtarisht ambasadorin e saj nga Ankaraja. Dhe nuk pranon një ambasador të ri turk.
Ambasadorit holandez i qe refuzuar hyrja në Turqi gjithsesi që nga marsi i vitit 2017. Tërheqja formale e ambasadorit holandez nga Ankaraja, e cila u shpall tani, ka më tepër efekt të lartë simbolik se sa praktik. Raporti mes Holandës dhe Turqisë, që të dy vende anëtare të NATO-s, ka arritur në pikë të ulët.
Gjatë bisedimeve të fundit ne “nuk arritëm të binim dakord se si mund t’i normalizonim marrëdhëniet tona”, tha ministri i Jashtëm holandez, Halbe Zijlstra. Për momentin nuk ka “asnjë perspektivë” për të arritur ndonjë zgjidhje dhe prandaj negociatat do të pezullohen, tha Zijlstra. Po ashtu për sa kohë që nuk do të ketë një marrëveshje, as Turqisë nuk do t’i lejohet të dërgojë një ambasador të ri në Hagë.

Jo fushatë zgjedhore në Holandë
Shkaku i konfliktit ishte refuzimi vitin e kaluar nga ana e qeverisë holandeze për t’u lejuar ministrave turq që të zhvillonin fushatë zgjedhore në Holandë. Rezistencë të ngjashme pati edhe në vendet e tjera evropiane.
Holanda nuk e lejoi marsin e vitit të kaluar, ministren turke të Familje Fatma Betül Kaya Sayan që të zhvillonte në Roterdam para bashkatdhetarëve të saj takime për të propaganduar reformën e diskutueshme kushtetuese për të vendosur një sistem presidencial në Turqi. Haga i ndaloi takime të tilla, edhe sepse pak më vonë në Holandë zhvilloheshin zgjedhjet parlamentare.
Meqë ministrja e Familjes u përpoq të shkonte në Roterdam, pavarësisht mosdhënies së lejes, policia e ndaloi konvojin e saj dhe e detyroi të kthehej dhe të largohej nga vendi nën shoqërimin e policisë. Pas kësaj, në Roterdam pati protesta të ashpra nga turq që jetojnë në Holandë, të cilat u shpërndanë me forcë nga policia.
Për shkak të ndalimit të mitingjeve nga ana e politikanëve turq, Recep Tayyip Erdogan e akuzoi Holandën dhe Gjermaninë se përdorin “metoda naziste”, gjë që shkaktoi indinjatë në Evropë.

Artikulli paraprakOKB heton raportet për sulmet kimike në Siri
Artikulli tjetërMerkel e gatshme për “kompromise të dhimbshme”