Një intervistë për të shuar të gjitha polemikat që kanë lindur në Argjentinë, pas disa fjalëve të Dybalas rreth mundësisë për të luajtur në krah të Lyonel Mesit. “Është e vështirë, sepse bëjmë të dy të njëjtat lëvizje”, do të shprehej kohë më parë Dybala. Talenti i Juventusit kërkon ta sqarojë një herë e mirë situatën.
“Në të njëjtën intervistë jam shprehur që është kënaqësi e madhe të luash përkrah Mesit, sepse prej tij mund të mësosh shumë gjëra. Fjalët e mia janë interpretuar keq, për të tërhequr sa më shumë vëmendjen. Leo është idhulli im, opinioni im për të është ekstremisht pozitiv”, u shpreh Dybala.
23-vjeçari është grumbulluar me Argjentinën bashkë me Mesin për miqësoret ndaj Rusisë dhe Nigerisë. “Në atë konferencë, 18 nga 20 pyetjet ishin për Leon dhe gjithmonë u shpreha me fjalë të mira për të, duke shpjeguar sesa e rëndësishme ishte figura e tij për të gjithë grupin. Sapo erdha në grumbullim shkova ta takoja për t’i shpjeguar se…, por ai më priti duke qeshur dhe më tha se gjithçka është e qartë dhe nuk kisha çfarë të sqaroja me të. Unë Mesi i ri? Dua të jem vetvetja, të fitoj trofetë e mi, me gjithë respektin që kam për Leon. Edhe Mesin e kanë krahasuar me Maradonën”, tha ai.
Për mosgrumbullimin e Gonzalo Higuain, Dybala komentoi: Njerëzit e duan “EL Pipitan”. Jep gjithmonë 100% në fushë dhe nuk ka çfarë të tregojë më shumë. Ai po punon shumë dhe ëndërron pjesëmarrjen në Botëror.
Argjentina ndodhet në Rusi për ndeshjen miqësore të 11 nëntorit kundër të zotëve të shtëpisë, në kuadër të përgatitjeve për Botërorin e ardhshëm. Sigurisht që e gjithë vëmendja është përqendruar te Lionel Mesi, ylli të cilin të gjithë e presin me padurim ta shohin në fushë verën e 2018-ës.
Padyshim që sulmuesi i Barcelona-s është duke kaluar kohën e tij të lirë mes tifozëve dhe admiruesve, duke dhënë autografe të shumta. Por një episod imteresant ka ndodhur të enjten. Mesi ka bërë një foto me Sebastian Driussi-n, sulmuesin argjentinas që aktivizohet te Zenit-i, të cilin nuk e ka njohur në atë moment.
