Nga Luçiano BOÇI
7 Marsit të sivjetshëm i mungon mësuesi.
Mos u habisni!
Mësuesin e kanë vrarë…
Ai sot është diku, duke bërë sikur, ose duke qeshur hidhur.
Ose është për forcë tradite duke festuar, por me revoltën e pathënë brenda tij.
Sepse Mësuesin, pushteti i sotëm e ka shembur, e ka poshtëruar.
Çfarë nuk ka bërë ky pushtet, për t’i zhvatur atij dijen, misionin.
Është përpjekur ta zhveshë nga fisnikëria, nga respekti dhe vlerësimi.
E ka sulmuar me qindra marifete, ligje, akte, udhëzime idiote, për ta shndërruar me dhunë në një aparatçik të rëndomtë.
Ka tentuar ta barazojë me zhigolotë politikë, me banditët e votave, me dhunuesë banalë.
Po mësuesi vetë?!
Ai vazhdon lufton…
Lufton me padijen e injorancën në krye.
Lufton me absurdin e një shoqërie që tenton rrëshqitjen drejt antivlerave.
Ai vazhdon misionin e vet hyjnor.
Mësuesi ende vazhdon të dhurojë me modestinë e tij lapidare, shërbesë, përkujdesje e dashuri.
Madje do thoja që 7 Marsi sot, as festë nuk është më.
Nuk është, jo se nuk e duan mësuesit apo nxënësit, por se qeveritarët tanë e kanë shndërruar atë thjesht në një rast.
Nga ato rastet që poeti Ali Asllani do e quante deli rast, gjatë të cilit çakejtë e qeverisë, me jargavitjet e tyre, kërkojnë të rrëmbejnë simpatinë e mësuesve me detyrim, pasi i kanë kafshuar e rrëmbyer çdo gjë tjetër.
Rastin do e shfrytëzojë Besa, me sintaksën e saj çudibërse që të tromaks me njohuritë e gjëra për arsimin.
Fjalinë më të bukur, të bërë ndonjëherë ka atë: “Fajin e ka opozita”.
Rasti s’do t’i shpëtojë as Ramës, i cili ka që dje që po zgjedh në raftin e marrëzive të tij, batutën më shpëtuese.
Mund të tentojë dhe ndërtimin e ndonjë situate me ngjyra melankolie, si ajo e kongresit të fundit.
E në delirin e pushtetit dhe të pushtuar nga padija, ato harrojnë që Mësuesi nuk vdes!
Ai di dhe të heshtë me stoicizëm.
Di dhe të flasë me gjuhën e Ezopit.
Di dhe të revoltohet me zemërimin e arsyen e Prometeut.
Di dhe të fitojë me mençurinë e drejtësinë e Hamletit.
Mësuesi është më i fortë se çdo pushtet.
Ai është vetë dija!
Gëzuar të dashur mësuesë ditën tuaj të bukur!