Ndërprerja e kampionatit duket se erdhi në momentin e duhur për Milanin, që ndonëse fitoi së fundi ndaj Sassuolos, kaloi një periudhë mjaft të errët rezultatesh. Krahas formës jo të mirë, Montella duhej të bënte edhe llogaritë me dëmtimet e vazhdueshme të futbollistëve si Bonaventura, Calabria, Biglia, Conti, etj., por edhe pezullimin e Bonuccit. Gjithsesi, këto ditë ka pasur vetëm lajme të mira nga infermieria e kuqezinjve, që kanë lajmëruar rikuperimin e mesfushorëve Biglia dhe Bonaventura. Mjekët e Milanit njoftojnë se 2 mesfushorët janë të gatshëm t’i bashkohen ekipit në stërvitje dhe mund të zbresin në fushë, duke filluar që nga ndeshja e ardhshme e kampionatit.
Krahas tyre, lajme të mira vijnë edhe për mbrojtësin Calabria, i dëmtuar në transfertën ndaj Chievos. Ky i fundit pritet të jetë në dispozicion të Montellës brenda muajit nëntor, pasi do të rinisë stërvitjen me grupin këto ditë.
