Kryeministri i Kosovës, Ramush Haradinaj, ka folur për raportet e tij me presidentin e vendit, Hashim Thaçi.
Haradinaj ka thënë në emisionin “Pressing”, në televizionin T7, se me Thaçin tashmë nuk komunikon.
Shefi i ekzekutivit ka deklaruar se është “i prishur” me Thaçin, por ka theksuar se nuk e ka “personale”.
Haradinaj në emisionin Pressing ka komentuar përplasjet e ashpra mes Presidentin Hashim Thaçi dhe ish-kryeministrit të Shqipërisë, Sali Berishën.
Haradinaj, kur pyetet nëse mendon se Berisha ka qenë “argat i Millosheviçit”, ashtu siç e quan Thaçi, thotë se kjo nuk mund të qëndrojë aspak.
“Thaçi është bashkëpunëtor i Aleksandër Vuciçit”, ka thënë Haradinaj.
Ai më tej ka treguar një histori që ia ka rrëfyer Berisha për lidhjen e tij me Kosovën që kur ka qenë fëmijë.
“Sali Berisha ma ka treguar një histori me agjin e tij. Më ka treguar se kur ka qenë i vogël ka ecur deri në një kodër në zonës ku ka jetuar. Prej atje ku shihej Kosova. Agja i ka thënë se atje është Kosova dhe ajo është zemra e Shqipërisë”, ka treguar Haradinaj.
Sipas Kryeministrit, kjo tregon se lidhja e Berishës me Kosovën është e thellë dhe ai nuk mund të shihet si bashkëpunëtor i Serbisë asnjëherë.
Haradinaj: Le të qesë Thaçi çkado që ka për mua
Kryeministri Ramush Haradinaj i është përgjigjur akuzave të shpeshta të Presidentit Thaçi për takimet me të ashtuquajturin ‘kokën e Veriut”, Milan Radojçiç.
Thaçi ka folur vazhdimisht për takime të fshehta me Radojçiçin, duke aluduar në Kryeministri Haradinaj.
Haradinaj në emisionin Pressing thotë se nuk ka pasur takime të fshehta me Radojciqin dhe se me të ka bashkëpunuar si zyrtar i Listës Serbe.
“Me pas pasur diçka për mua, m’i kishin qitë. Hashimi cka ka për mua le te qet në tavolinë. Jo vec ai po edhe të tjerët”, ka thënë Haradinaj.
“Nuk ka ma zyrtar se Vuciqi”, ka shtuar ai.
Sipas Haradinajt, Thaçi po e sulmon pasi po i druhet besimit që ai po ka.
“Është rritur besimi për Ramush Haradinajn dhe për AAK’në”, ka thënë Haradinaj në Pressing.
