Avokati i Tahirit, Maks Haxhia ka surprizuar opinionin duke deklaruar se, dokumenti i paraqitur nga ish-ministri i Brendshëm ku provohet se ndaj tij nuk ka një proçedim penal në Itali është marrë në mënyrë private. Haxhia ka shkuar më tej duke thënë se, dokumenti është marrë nga Sekretaria e Prokurorisë dhe jo sikurse duhej marrë përmes aplikimit. Po sipas Haxhisë, dokumenti i paraqitur nga Tahiri publikisht se ai ishte i pastër në Itali nuk ka vlerë ligjore. Avokati është munduar të mbrojë në këtë mënyrë klientin e tij, i cili ndodhet para një tjetër skandali në Itali që përbën një krim të rëndë.
“Nuk ka vlerë juridike. Letra që kemi marrë ne nuk është për të vërtetuar dhe paraqitur procedurialisht në formën e kërkuar. Nëse do të vinte rasti për ta bërë këtë, do t’i drejtoheshim titullarit të institucionit të Prokurorisë së Katanias”, tha ai.
Avokati Haxhia tregoi në “Top Story” ndryshimin, sipas tij, të letrës së bërë publike nga Saimir Tahiri më 24 tetor dhe letrës së publikuar nga “Top Channel” në edicionin qendror të kësaj të mërkure.
“Ka dy mënyra sesi tërhiqet një letër. Letra juaj (Top Channel) është marrë nga titullari i institucionit, kurse letra jonë është marrë nga Sekretaria e institucionit. Kur merret nga titullari është ndryshe, kurse ky i yni ishte një dokument i marrë në Sekretarinë e Prokurorisë së Katanias”, u shpreh Haxhia. Avokati tha se çdokush mund të marrë një vërtetim në lidhje me një çështje të tillë.
