Edhe ditën e sotme maturantët janë mbledhur përpara Ministrisë së Arsimit ku i bëjnë thirrje ministres Besa Shahini të dalë në bulevard.
”Dil në bulevard, shkolla është e jona, jo biznes privat”, thërrasin maturantët.
Protestuesit, ndryshe nga dje, ditën e sotme kanë bllokuar rrugën e Durrësit.
Gjatë deklaratave nga protesta, ata u shprehën se ndihen të ofenduar nga deklaratat e ministres së Arsimit Besa Shahini, e cila një ditë më parë e cilësoi protestën e tyre partiake.
Ata do të paraqesin një akt me 10 pika dhe argumente përse provimi i Gjuhë-Letërsisë ishte absurd. Ndërkohë maturantët shprehen të bindur se protestat do të vijojnë në të gjitha qytetet.
“Unë ftoj të gjithë intelektualët që të na bashkohen. Ndoshta nesër do të bëjmë një marshim të madh. Nuk duhet t’u shkatërrohen ëndrra maturanteve”, tha një protestues.
Edhe në qytetin e Fierit dhjetra maturantë po protestojnë para Bashkisë dhe drejtorisë arsimore. Nga nxënësit është kërkuar që të plotësohen kërkesat duke rrëzuar tezën e provimit si dhe vlerësimin me notën përfundimtare në këtë provim duke marrë 40% të notës së provimit dhe 60% të notës së lëndës gjtë vitit shkollor.
Maturantët janë shprehur se do të vijojnë protestat dhe do të bojkotojnë provimin e ardhshem nëse nuk do të plotësohen kërkesat e tyre.
