Disa dosje të rëndësishme janë gjetur në bagazhin e makinës së prokurorit Arjan Ndoja, i cili mbeti i plagosur në atentatin ndaj tij në zonën e Shkozetit në Durrës.
Burime brenda Policisë së Shtetit thanë për Top-Channel se, në bagazhin e makinës ku ndodhej prokurori i Durrësit së bashku me një person me rekorde kriminale, janë gjetur disa thasë me dokumente.
Ndër këto dokumente është gjetur edhe dosja e vjedhur nga kasaforta e Prokurorisë së Durrësit disa kohë më parë, si edhe dosja e gjykatësit të vrarë disa vite me pare, Skerdilajd Konomi!
Të njëjtat burime thonë se pista kryesore e hetimit është pikërisht një konflikt për tokat e pretenduara nga familja e viktimës, ku disa kohë më parë është bërë një transaksion i dyshimtë në hipotekën e Durrësit në favor të një organizate kriminale, çka mendohet se ka çuar edhe në konfliktin mes prokurorit dhe drejtuesit të ri të hipotekës që kishte rënë në gjurmët e këtij transaksioni!
Nëse e gjithë sa u tha nga burimet rezulton e saktë, atëherë del në pah lidhja e supozuar mes prokurorit dhe personit me rekorde kriminale që gjendej në makinë me të, i cili figuron pjesëtar i asaj organizate.
Në maj të vitit 2018 në Prokurorinë e Durrësit ndodhi një grabitje e dokumentave nga persona të paidentifikuar të cilët kishin arritur të dëmtonin edhe serverin. Në atë kohë u dha se asnjë dokument nuk kishte humbur sepse ishte i dubluar.
Dokumentet e tjera sipas burimeve lidhen me ish gjyqtarin Skerdilajd Konomi, i cili u ekzekutua me një bombë në vitin 2011. Makina e tij shpërtheu nga një eksploziv i telekomanduar, ndërsa gjyqtari ishte në timon në bulevardin Vlorë-Skelë. Një nga pistat kryesore të vrasjes së Konomit, mbetet çështja e pronave që paraardhësit e 33- vjeçarit zotëronin në Hamallaj të Durrësit.
