Berisha: Shpërbleni të përmbyturit, jo njëri-tjetrin

Qëndrimi i qeverisë ndaj të përmbyturve, cinizëm dhe injorim total ndaj tyre dhe pasojave të rënda me të cilat ata përballen!
Zotërinj, ndodhi një katastrofë në zonën e Vjosës dhe zona të tjera. Nuk ka gjë më çnjerëzore, më të shpërfytyruar para këtyre njerëzve se sa rrahja e gjoksit, krenaria absurde e këtyre qeveritarëve, të cilët rrijnë dhe i bëjnë elozhe njëri-tjetrit, harrojnë se u është mbytur gjëja, u është mbytiur e gjithë shtëpia, janë të sëmurë, janë pa bukë, janë pa asnjë ndihmë, ndërsa këta rrinë dhe lavdërojnë njëri-tjetrin. Njëri thotë se, Olta ka ndenjur 48 orë pa gjumë, a thua se ky ishte monitorimi i gjumit të saj, tjetra thotë se jam krenar me këtë e krenar me atë, krenar me përmbytjet, me vuajtjet e njerëzve, me përmbytjet e njerëzve.
Si ka mundësi ky moral të sillet këtu në Parlament? Të paktën mbajeni në kabinetin qeveritar, mos e sillni këtu në Parlament, sepse qëndrimi juaj ndaj të përmbyturve është cinizëm total, është injorim total, i pasojave të rënda me të cilat përballen. Shumë mirë që i shpërbyet ushtarakët dhe ju përgëzoj për këtë, por para së gjithash duhet të shpërblehen, ata të cilët s’kanë kotheren, sepse ja u mori Vjosa, sepse ju i vodhët fondet. Thoni që keni investuar 10 milionë euro në pritat e Vjosës, por në fakt keni vjedhur 10 milionë euro në pritat e Vjosës. Shkoni shihni pritat e ndërtuara disa vite më parë, nuk kanë lëvizur vendit. Kurse pritat tuaja i mori lumi sikur të ishin prej kartoni.
Ndaj këtu, lavdërime dhe rrahje gjoksi për lavdira mbi mjerimin, vuajtjen, dhimbjen e qytetarëve të përmbytur nga babëzia dhe abuzimi i atij kryeministri dhe këtyre ministrave këtu nuk duhet të ketë më. Kjo ishte kërkesa ime.