Barcelona është ende e frikshme, edhe pa Neymar, sipas sulmuesit të Chelsea, Willian. Goli i minutës së 62-të i Willian u barazua nga ai i Lionel Messit, pasi ekipet sigluan rezultatin 1-1 në “Stamford Bridge”, në ndeshjen e parë të 1/8 finale të Ligës së Kampionëve. Ylli i Brazilit, Neymar, mund ta ketë lënë Barçën për PSG-në verën e vitit të kaluar, por Willian beson se gjigantët spanjollë mbeten një nga ekipet më të mira të planetit. “Mendoj se Barcelona është Barcelona, me ose pa Neymar, tha Willian. Sigurisht, Neymar është një lojtar i madh, por ata kanë Messin, kanë Iniesta, kanë Suarez. Ata kanë lojtarë me të vërtetë të mirë, kështu që Barcelona është gjithmonë Barcelona”. Ndërsa hapi rezultatin, Willian, gjithashtu, e goditi dy herë shtyllën e portës katalanase gjatë përplasjes së të martës. Dhe pavarësisht dështimit të Chelsea për ta mundur Barçën, 29-vjeçari ende beson se ekipi i tij mund të arrijë në çerekfinale, me një rezultat pozitiv në “Camp Nou”, më 14 mars. “Sigurisht, ne mund të shkojmë atje dhe të bëjmë një punë të madhe, përsëri. Do të jetë një lojë krejtësisht e ndryshme, tha Willian. Mendoj se mund të shkojmë atje me këtë mentalitet, mund të luajmë me shpirt të madh dhe të përpiqemi të fitojmë ndeshjen”.
