Pas dhunës verbale të ministrit të Shëndetësisë, Ilir Beqaj, me gazetarin e “Zërit të Amerikës” në Shkodër, një tjetër ministër i kabinetit “Rama” përplaset me gazetarët. Bëhet fjalë për ministrin e Brendshëm, Saimir Tahiri, i cili së fundi ishte për një vizitë në Athinë.
Gjatë takimit me emigrantë shqiptarë, Tahiri i ka kërkuar gazetarit Shpëtim Zinxhira që të mos e xhironte takimin. Fjalët me të cilat i është drejtuar Tahiri gazetarit kanë qenë aspak etike. Vetë gazetari e ka denoncuar ngjarjen në faqen e tij në Facebook.
“Ministër gangster apo rrugaç? Priste një falje nga ministri po më kot, pasi gangsterët nuk dinë të sillen si njerëz, nuk dinë se ç’është edukata dhe personaliteti aq më keq kur janë të veshur në pushtet. Nuk respektojnë moshën edhe pse përballë kanë baballarët e tyre…”, shkruan Zinxhiria.
Më tej, Zinxhira shkruan “kamera u fik në një kohë që ministri kishte humbur toruan dhe po u kthente përgjigje emigrantëve me zë të lartë”. Sipas tij, askush nuk mund ta mohojë këtë incident. Më poshtë pjesë nga debati:
DEBATI
Ministri: Fike atë kamer ti more!
Gazetari: Bëj detyrën!
Ministri: Çfarë je ti?
Gazetari: Jam gazetar, unë punën time ti punën tënde!
Ministri: As më plas fare!
Ambasadori, gazetarit në vesh po deshe fike kamerën…
