Kryetari i opozitës, Basha denoncoi dje pazaret e pista që i janë ofruar partive aleate të PD me qëllim që ata të tradhtojnë misionin e kauzës së zgjedhjeve të lira dhe t’i bashkëngjiten pazareve që Rama u ka ofruar atyre për t’u bërë pjesë të farsës zgjedhore.
Njërës nga partitë opozitare i janë ofruar 15 vende në farsën zgjedhore ku Rama përcakton edhe numrin se sa deputetë do të marrë secila parti. Një partie tjetër i janë ofruar 10, ndërsa një partie të tretë 5 deputetë. Kjo është farsa që Rama përgatit për 18 qershorin. Të gjithë të përcaktuar që nga numri edhe nga detyrat që do të kenë.
Pazari nuk është mbyllur vetëm me numrin e deputetëve, por janë ofruar edhe paratë e pista të drogës në këmbim të përfshirjes në farsën zgjedhore. Njërit prej krerëve të partive aleate i janë ofruar 500 mijë euro që të bëhet pjesë e farsës zgjedhore.
“Një partie i ofruan 15 deputetë, dikujt tjetër 10, dikujt tjetër 5, për të lënë dhe braktisur luftën e përbashkët të interesit qytetar të kësaj lëvizjeje popullore.
Kryetarët e partive aleate i thanë JO! I thanë JO! I thanë JO kësaj oferte të ndyrë, për t’i bërë pjesë të lojës së shahut, për arsyen e thjeshtë, sepse njësoj si unë, njësoj si Partia Demokratike, edhe ata janë në këtë betejë krah për krah jush qytetarëve shqiptarë, jo për interesat e tyre politike, por për një Shqipëri të re të qytetarëve shqiptarë, e cila po vjen e do të vijë sepse kjo nuk është lojë shahu, por është bashkimi më i madh i shqiptarëve për zgjedhje të lira dhe të ndershme.
Edhe partnerët ndërkombëtarë që vijnë, i trajton si gurë shahu. Në lojën e tij, sigurisht nuk është fushë shahu tamam, sepse fusha nuk është fushë prej druri, gurët nuk janë prej druri, apo jo? Dhe nuk lëvizen thjesht me dorë, por lëvizen edhe me gjëra të tjera e keni parasysh apo jo?
Çfarë është kjo? Zhagia. Edi Rama nuk ka lekë, por ofron 500 mijë euro vetëm për një kryetar partie që ta fusë në zgjedhje. Lekët e kujt janë këto? Tuajat dhe të gjithë shqiptarëve. Janë lekët që kurrë nuk shkojnë tek kryefamiljari këtu, që ka fëmijën 6-muajsh, që ka mbaruar shkollën dhe kualifikimet, por s’ka punë”, tha Basha.
Në kontratst me këto pazare Rama kërkon pushtet të përjetshëm, ndërsa largimi nga llogaridhënia përmes votës së lirë zhyt vendin në një kolaps ekonomik dhe çon vendin drejt diktaturës.
“Ju e dini se, ekonomia jonë është shkatërruar nga taksat e larta, nga keqqeverisja, nga pasiguria. Ju e dini fare mirë se motivimi i forcës sonë punëtore dhe konkurrueshmëria e tyre, është më e ulëta në Ballkan për shkak të keqqeverisjes, çmimit të lartë të naftës dhe të energjisë. Ju e dini fare mire, se sa e vështirë është bërë sot të mbash vendin e punës e jo më të gjesh një vend tjetër pune. Sa e vështirë është të marrësh kredi, akoma më e vështirë, të shlyesh kredinë e marrë. Se sa të larta janë çmimet në tërësi e në veçanti çmimet e energjisë dhe të naftës. Të gjitha këto, ju i dini fare mirë, sepse kjo nuk është lojë shahu. Kjo është jeta e përditshme e shqiptarëve të zakonshëm.
Ndaj dhe jemi këtu, ndaj dhe jam këtu. Nuk e harrojmë dhe mos harroni. Nuk është lojë shahu. Mos e merr kaq lehtë Edi Rama, është jeta e miliona shqiptarëve.Thirri mendjes!
Nuk ka për të pasur zgjedhje pa opozitën dhe pa popullin. Nuk ka për të pasur një Parlament monist. Mos abuzo me natyrën tonë demokratike, paqësore dhe europiane sepse kur gjithçka të shterohet, shqiptarët dhe unë në krye të tyre, do të ta mësojmë që nuk është lojë shahu”, tha Basha.
Parlament të emëruar nga krimi nuk do të ketë
Asnjë element i inkriminuar nuk do të mund të shkelë më në Parlament. Duke reaguar ndaj deklaratave të Ramës se pa opozitën Parlamenti do të jetë më i mirë, Basha tha dje se ëndrrat e Ramës për një Parlament monist me njerëz të emëruar nga krimi e droga nuk do të bëhen kurrë realitet. “Dita e sotme, sjell bashkë të rinj dhe të reja, të moshuar, profesionistë, intelektualë, artistë, si gjithmonë pjesë e kësaj tende. Disa prej tyre e shprehin zemrën e lirisë, shpirtin e tyre të lirisë më mirë me dorë, me krijim dhe emocionohen kur vijnë e flasin këtu, por kjo nuk besoj se është asnjë problem apo jo?!
Por të gjithë flasin të vërtetën. Ky është realiteti.
Çfarë flitet këtu as nuk censurohet, as nuk sponsorizohet, as nuk mësohet përmendsh, as nuk shtrembërohet nga propaganda. Kjo është Shqipëria e vërtetë pa regji qendrore, Shqipëria e halleve dhe problemeve, e mbushur me pasiguri, papunësi për shkak të një ekonomie të shkatërruar nga qeverisja e bërë njësh me krimin dhe drogën.
Pasi ka shkatërruar dhe kapur gjithçka, qeveria e Edi Ramës dhe ai vetë ka një plan të kapë zgjedhjet e ardhshme. A e dëgjuat dje si u thoshte shqiptarëve, se Parlamenti i ri do të jetë më i mirë pa opozitën se do të ketë më pak sherre?!
Parlamenti më me pak sherre ka qenë Kuvendi Popullor i Republikës Popullore Socialiste të Shqipërisë, aty s’kishte sherr fare sepse dajaku, terrori, plumbi, internimi dhe burgosja e qindra mijëra shqiptarëve, ishte në rend të ditës”, tha kreu i PD.
Basha bëri të qartë se Parlament pa opozitë nuk do të ketë më kurrë Shqipëria, ndërsa paralajmëroi Ramën se nëse vijon të sillet me akte prej diktatori edhe fundin e tij politik do ta ketë të tillë.
“Sa më pak sherr në Parlament, aq më shumë njerëz të terrorizuar, aq më shumë të drejta të shkelura. Sa më pak të ketë mundësinë të ngrejë zërin në Parlament përfaqësuesi i popullit, aq më shumë shtypet, vidhet dhe nëpërkëmbet populli. Ky është një mësim i patjetërsueshëm i historisë.
Prandaj, edhe nëse e marrim dhe me gjuhën e tij naive, do të thoja është në kufijtë e idiotësisë politike.
Le t’i themi sot, ta harrojë se do të ketë një Parlament të emëruar nga droga dhe krimi, një Parlament monist dhe gojëmbyllur. Sepse kjo do të thotë edhe më shumë dhunë, edhe më shumë terror, edhe më shumë papunësi dhe varfëri mbi qytetarët e thjeshtë të këtij vendi.
Ky binom: Parlament pa zë, pa opozitë dhe një popull i shtypur, nuk ka për të ndodhur! Parlament të tillë, as nuk ke për të pasur, as nuk ke për të gëzuar, asnjë orë të vetme! Prandaj thirri mendjes kur artikulon ëndrra diktatoriale sepse përndryshe të vjen fundi i diktatorit”, tha Basha.
Mblidhen 1/3 e kartave të identitetit në Elbasan për zgjedhjet
Basha zbuloi dje një rast të mirëfilltë se si partia në pushtet ka nisur fushatën e manipulimit të zgjedhjeve, ndërsa bëri të ditur se në Elbasan janë mbledhur 1/3 e kartave të identitetit me qëllim vjedhjen e votave apo tjetërsimin e vullnetit të qytetarëve. “E dini që vetëm në Elbasan, 1/3 e kartave të identitetit i kanë mbledhur? I kanë mbledhur. Mendoni që kështu shkohet në zgjedhje? Mendoni se kështu do ta marshoni Shqipërinë dhe shqiptarët deri në zgjedhje?
Gaboheni rëndë. Kjo nuk ka për të ndodhur.
Qeveri teknike, që do të zbatojë ligjin e dekriminalizimit, që do të luftojë paktin e drogës dhe parave të drogës në zgjedhjet e ardhshme, që do të garantojë votën e lirë të shqiptarëve e të pacenuar.
Ne kemi qenë dhe jemi të bashkuar. Ne kemi qenë shumë dhe sot jemi më shumë. Kemi qenë të fortë e sot jemi akoma më të fortë.
Kemi qenë të duruar, por sot jemi më të paduruar. Ose zgjedhje të lira dhe të ndershme, ose zgjedhje të tjera në Shqipëri nuk do të ketë. Bashkimi i shqiptarëve nuk do të lejojë më kurrë kthimin në monizëm.
Ka vetëm një rrugë përpara: zgjedhje të lira dhe të ndershme. Rikthimin e Shqipërisë tek shqiptarët. Republikë e re!”, tha Basha.
Kjo nuk është lojë shahu
Një lojë shahu e ka cilësuar Rama qëndresën e shqiptarëve kundër varfërisë, papunësisë, korrupsionit, krimit e drogës në pushtet. Basha dënoi dje deklaratat e Ramës ndaj lëvizjes popullore, ndërsa tha se kjo nuk është një lojë, por është revolta e shqiptarëve të bashkuar për t’i dhënë fund republikës së vjetër me në krye Ramën.
“Ai bashkë me shpurën e tij kriminale, e konsideron këtë një lojë shahu, një lojë force. Këto halle, këto probleme që ngrini ju bashkë, 87 ditë e netë me radhë, halle që ju mblodhën dy herë në vërshimet më të mëdha popullore, më 18 shkurt, edhe më shumë më 13 maj, këto probleme nuk i sheh Edi Rama dhe kupola e tij politike e republikës së vjetër.
Sepse, për ta, pushteti ka vetëm një qëllim, ka vetëm një axhendë, axhendën e pasurimit dhe kontrollit total të vendit nga ana e tyre. Por, kjo nuk është axhenda juaj, ky nuk është interesi juaj. Ky është vetëm interesi i Edi Ramës dhe çetës së korruptuar kriminale në pushtet.
Ndaj nuk e sheh të vërtetën, siç refuzon të shohë problemin e krimit dhe të drogës. Për të, gjithçka është një lojë shahu, e tha vetë apo jo?! Unë i kam thënë se është teatër kukullash. Nuk jemi shumë larg, e ka pohuar vetë. E pohoi me ndërgjegjen e tij, e pohoi këtë që kemi thënë. “Kjo është lojë shahu”. Lojë shahu apo teatër kukullash, pak rëndësi ka. Ai ju sheh ju, ai sheh politikanët, ai sheh miqtë tanë ndërkombëtarë, si gurë shahu në lojën e tij të shahut.
Kjo nuk është lojë. Kjo lëvizje, ky bashkim shqiptarësh nuk është lojë. Hallet tuaja nuk janë lojë. Shpresat tuaja nuk janë lojë. Republika e re që po vjen nuk është lojë!
Po pse e shikon si lojë shahu Edi Rama këtë përballje për jetë a vdekje, midis dëshpërimit e shpresës, midis errësirës dhe dritës, midis papunësisë dhe varfërisë dhe shanseve për mirëqenie në bazë të punës së ndershme për çdo shqiptar? Pse?
Pse e shikon si lojë shahu? Sepse, për të, njerëzit janë statistika, janë shifra, janë gurë shahu. Për të vetëm pasurimi i tij, vetëm pushteti i tij ka rëndësi”, tha kreu i PD.
Listat jashtë afatit, procesi zgjedhor në kolaps
Kolegji Zgjedhor duhet të ngrihet në lartësinë e Kushtetutës duke refuzuar presionin qeveritar në vendimmarrjen mbi ankimimin për shkeljen e afateve ligjore në dorëzimin e listave të kandidatëve nga ana e koalicionit qeveritar në KQZ.
Basha u shpreh dje se Kolegji duhet të dëshmojë integritet në dhënien e vendimit. “Shikoni se çfarë bëri me procesin monist dhe farsë që po gatit më 18 qershor. Pasi e futi procesin në kolaps ligjor, listat i ka 24 orë me vonesë dhe nëse ia dalin ata burra dhe gra të Kolegjit Zgjedhor të çlirohen nga dara e presionit qeveritar që ka filluar dhe nga zhaget që po u tundin, do ta konstatojnë këtë, sepse çdo shqiptar mund të numërojë nga zero deri në 50 apo jo?
Nëse jo, faqja e tyre e zezë, por le të shohim. Le të shohim, a do të kenë kurajon dhe integritetin të numërojnë, siç numëron çdo shqiptar nga zero deri në 50 dhe të deklarojnë, siç deklaron çdo shqiptar, çdo fëmijë, se afati ka kaluar dhe 18 qershori është rrëzuar edhe ligjërisht.
Tani çfarë po bëjnë? A e patë? U kanë dalë lakrat në shesh. A i patë listat e partive që kishin futur të gjithë fisin? I patë apo jo? Gjithë fisin! Turp i madh! Po ato partitë e tjera që s’ia kishin dalë të fusnin kandidatë as me shkollë të mesme, a i patë? I patë apo jo?
Nuk kam asgjë kundër, që përfaqësuesit e popullit nëse janë zëdhënës të vërtetë të popullit, të ketë çfarëdo arsimi që kanë pasur mundësinë të ndjekin, por kjo nuk është arsyeja, sepse në ato lista kishte njerëz me shtatë vjeçare”, u shpreh kreu i PD.
Kreu i PD, Basha reagoi gjithashtu edhe ndaj personave të pakualifikuar e të paarsimuar që partitë në pushtet kishin futur në listat e kandidatëve për deputetë. “Nuk janë tribunë të popullit. Se mund të jenë tribunë edhe me shtatë vjeçare e të përfaqësojë njerëzit e popullit, se ne për këtë luftojmë, për republikën e qytetarëve, për republikën e popullit. Po nuk janë të tillë!
Janë gurë shehu, në lojën e shahut të Edi Ramës. Merre – veje këtu. Sa më pak shkollë, aq më mirë. A ka mundësi të mos flasë fare. Siç kishte ata kriminelët në Parlament që nuk lidhnin dot dy fjalë, ata kandidatë për kryetar bashkie që ngatërroheshin kur fjalia kishte dy folje. E mbani mend apo jo?
Gurët e shahut nuk kanë nevojë të flasin. Zot na ruaj kur të flasin edhe gurët e shahut, të ngatërrohet loja totalisht.
Nuk mbaron këtu. Listat me fisin. Listat me kandidatë me shtatë vjeçare, janë njëra faqe. Faqja tjetër, janë ofertat e ndyra që i bëjnë aleatëve tanë për t’u bërë pjesë e procesit”.
