Patrice Evra ka kërkuar t’i ndezë ish-bashkëlojtarët e vet te Juventus, me një video të publikuar në Instagram. Mbrojtësi i Marseille, 36-vjeçar, zgjodhi Paolo Dybala-në, Mario Mandzukiçin, Leonardo Bonuccin, Dani Alvesin, Alex Sandron, Giorgio Chiellinin dhe Sami Khediran për t’ua dërguar nga një mesazh para finales së Ligës së Kampionëve kundër Real Madridit të shtunën në Cardiff.
“Pak forcë para lojës së madhe. Dua që të gjithë ju ta tregoni më të mirën. Uroj që vërtet ta fitoni Champions League. Do t’ju dua përgjithmonë”, u ka thënë Evra drejtuar lojtarëve të Juventus.
“Kapiten, ia kemi arritur apo jo? Gigone!”. “Paolo, e dua maskën! Nuk e di se ku e ke lënë. Por mos më zemëro! Shënoje një gol, një siç ti di”.
“Mandzukiç, mos asgjë një javë para lojës. Nuk është mirë, nuk është mirë, e tmerrshme për një luftëtar”.
“Bonu, nuk e di nëse e ke pastruar fytyrën dhe dhëmbët. Dua të të shoh si ushtar si zakonisht”.
“Dani, luaj mirë, luaj mirë”.
“Alex, dua të jesh si tren. Vrapo para dhe mbrapa, para dhe mbrapa, siç e bëj unë”.
“Chiellini, dua ta luash gorillën. Mos lejo asgjë të të kalojë”.
“Në fund, mos më bëni të qaj djem”.
“I di, e di, Sami!”, ka përfunduar Evra.
Ndërkohë, Andrea Pirlo beson se Gianluigi Buffon e meriton ta fitojë Topin e Artë nëse Juventus e mposht Real Madridin në finale të Ligës së Kampionëve. Buffon është duke synuar që ta fitojë për herë të parë trofeun kryesor evropian për klube, teksa Juve është duke u përgatitur për finalen e së shtunës në Cardiff.
Pirlo, ish-bashkëlojtar i Buffonit te Juventus dhe kombëtarja e Italisë, ka thënë se portieri italian do të ishte fitues i denjë i Topit të Artë, nëse Juventus tregohet i suksesshëm. “Mendoj se po. Këtë herë mendoj se është viti i duhur”, ka thënë Pirlo për “Corriere della Sera” kur është pyetur nëse Buffon duhet ta fitojë Topin e Artë nëse Juventus triumfon ndaj Real Madridit.
Juve është duke u përgatitur për t’u përballur me Real Madridin në finale të Ligës së Kampione, e cila do të luhet të shtunën në Cardiff. Nga kampi i Juves vijnë indikacione se Max Allegri do të luajë me formacion 4-2-3-1. Por një lojtar që ka pak mundësi të paraqitet është Stefano Stuararo, i cili u lagua nga seanca stërvitore para kohe pas një problemi muskulor dhe raportohet se do ta humbasë finalen.
