Vehap KOLA
Më 19 tetor 1986, pas 20 vitesh burg në burgjet më çnjerëzore të komunizmit, Havzi Nela u lirua, por iu ndalua kthimi pranë nënës në fshatin e tij. Më 12 tetor 1987 Havziu u kthye fshehurazi në fshatin e tij, Kollovoz ku e ëma po jepte shpirt e përvëluar që nuk e shihte të birin prej 20 vjetësh. Im atë më ka treguar se ai doli dhe i vizitoi të gjithë shtëpi më shtëpi, dhe në fshatin e shpërndarë në tri lagje, erdhi edhe në shtëpinë time, kur une isha vetëm 4 vjeç.
Kishte ardhur për t’u parë me njerëzit, për t’i ngushëlluar për vdekjet e prindërve të tyre e për t’u uruar lindjet, fejesat e martesat e fëmijëve gjatë këtyre 20 viteve.
Si u zbulua se Havzi Nela kishte thyer urdhërin për të mos dalë nga Arrëni, u arrestua dhe u dënua me vdekje në 24 qershor 1988. Me 10 gusht 1988, me nënshkrimin e Kristaq Ramës ai u ekzekutua me varje tek agjensia në Kukës.
P.S. Pasi e lanë të varur për orë të tëra që ta shihnin banorët e Kuksit dhe të terrorizoheshin, Havzi Nelën e varrosën vertikalisht në një gropë afër fshatit Kolsh.
Kur u zhvarros nga të afërmit në vitin 1993, koka nuk iu gjet. Kokën ia kishin prerë pasi kishte vdekur në litar.