Policia greke ka sekuestruar 230 kg marijuanë në një operacion të zhvilluar në Janinë. Në kuadër të këtij operacioni të realizuar në fshatin Likostomo, Janinë, janë arrestuar 4 persona me kombësi greke. Fillimisht është ndaluar një mjet në të cilin ndodheshin dy femra, përkatësisht 25 dhe 24 vjeç, të cilat ishin furnizuar në kufirin e gjelbërt.
Në mjetin e këtyre të fundit janë gjetur 77 pakot me 230 kilogramë e 150 gramë marijuanë. Më pas nga policia helene është ndaluar edhe një mjet tjetër që shërbente për kontrollin e rrugës, ku janë arrestuar dy meshkuj grekë 22 dhe 24 vjeç.
Një ditë më parë, policia greke sekuestroi 43 kg drogë në Janinë dhe vuri në pranga një shqiptar. Policia u vu në ndjekje të shqiptarit dhe arriti ta ndalonte në një rrugë sekondare pranë fshatit Mazaraki, 35 km larg pikës kufitare të Kakavijës. Në sedilen e pasme të automjetit, u gjetën dy çanta me 40 paketime, që përmbanin 43 kg kanabis.
30-vjeçari kishte me vete edhe një pistoletë të tipit “Tokarev” dhe një thikë, që iu sekuestrua, ashtu si dhe droga e automjeti. Në banesën e tij, në Igumenicë, policia sekuestroi dhe një shumë monetare prej 1.100 eurosh, që e konsideron si produkt të trafikut të drogës, si dhe 5 pilula narkotike. 30-vjeçari do të dalë para prokurorit të Janinës, ndërkohë që policia po vijon hetimet për të zbuluar destinacionin e drogës.
