Marek Hamsik beson ka ardhur koha që Napoli të fitojë titullin e Serie A dhe zbulon punën e madhe që duhet të bëjë skuadra nën drejtimin e Sarri-t. “Që nga momenti i parë që mbërrita këtu e kuptova menjëherë se sa i rëndësishëm është futbolli për napolitanët. Është si një fe apo një sëmundje që të shoqëron çdo ditë. Pas kaq shumë vitesh kam një marrëdhënie tepër të veçantë me tifozët”.
Stili i bukur i futbollit që ka implementuar Sarri ka fituar zemrat e të gjithë botës, por nuk është e lehtë të mësohet kollaj nga blerjet e reja. “Është e bukur për t’u parë, por shumë e vështirë për t’u implementuar. Duhet të vrapojmë shumë, të bëjmë presing. Nuk është futboll i thjeshtë. Nëse rifitojmë topin, atëherë mund të fokusohemi te forca jonë – mbajtja e topit”.
“Gjatë javës gjithmonë luajmë në stërvitje me vetëm dy të prekura të topit. Në mënyrë që të lëvizim topin sa më shpejt. Por nëse topi shkon te një nga sulmuesit ata janë të lirë të driblojnë”.
“Sarri është një duhanpirës i apasionuar. Nuk kam parë njeri të tymosë si ai. Kur jemi në fushë ai pret shumë nga ne. Ndërsa jashtë saj ai është një njeri i qetë, bën shaka dhe është shumë i shoqërueshëm”.
“Kemi luajtur më shumë se gjysmën e sezonit dhe jemi kokë më kokë me Juve-n. Klubet e tjera janë larguar. Mbase nuk do të ndodhë më në vitet e ardhshme, prandaj duhet të mundohemi me të gjitha forcat të fitojmë këtë sezon. Juve është një klub i klasit botëror me vlerë 600 milionë euro. Nuk mund të krahasohemi me këtë. Por jemi pranë arritjes së diçkaje të pabesueshme dhe duam t’i mundim. Jam i sigurt se ka ardhur koha e Napolit”.
