Në 20 vitet e fundit zona e ish-Kënetës në Durrës nuk ka njohur asnjë investim, duke bërë që banorët e zonës të ndjehen të harruar nga pushteti lokal edhe pse thonë se paguajnë taksat si qytetarë normalë. Më dramatike janë kushtet e personave me aftësi të kufizuara që janë izoluar në shtëpi, për shkak se nuk kalojnë dot në rrugët e pashtruara. Banorët e zonës së ish-Kënetës në Durrës thonë se pushteti lokal po i injoron, ashtu si ka bërë edhe 20 vitet e fundit duke i lënë në kushte të vështira jetese, edhe pse ata paguajnë rregullisht taksat dhe detyrimet e tjera. Banorët thonë se rrugët e shkatërruara, plehrat e papastruara dhe kanali i hapur i ujërave të zeza që përshkon përmes banesave të tyre po ua bëjnë jetën të pajetueshme. Banorë: “Çdo gjë këtu është një katastrofë, erë e keqe, muskonja, shumë plehra. Sa del në mëngjes vjen aroma e ujërave të zeza. Kjo ka vite dhe ne presim pasi na kanë dhënë shumë premtime dhe kemi shpresa. Sivjet kanë filluar pastrimet e dy kanaleve kryesore. Për shkak të këtyre kushteve, personat me aftësi të kufizuara gjenden të izoluar, pasi e kanë të pamundur të kalojnë nëpër rrugët e lagjeve”. Personi me aftësi të kufizuar: “Kanalizimet, rrugët, plehrat, gjithçka është problem për ne. Është shumë e vështirë jetesa këtu, por s’kemi çfarë të bëjmë. Prej më shumë se 20 vitesh, në këtë zonë nuk është kryer asnjë investim. Me afrimin e verës, emergjente bëhet problemi i kanalit të hapur të ujërave të zeza që kthehet në burim sëmundjesh”.
