Ish-deputeti Bardh Spahia ka folur përmes një lidhje me skype me Fax News për situatën në të cilën ndodhet vendi ynë për shkak të pandemisë së koronavirusit, ndërsa theksoi se përgjigja ndaj saj nga autoritetet shqiptare ka qenë e vonuar.
Ai tha se edhe vetë Komiteti Teknik i Emergjencës i ngritur enkas për pandmeinë e ka përgënjeshtruar kryeministrin Edi Rama dhe deklaratat e tij për kohën kur pavarësisht denoncimeve dhe dyshimeve se koronavirusi kishte depërtuar në vend, ai shprehej se kjo është ‘infodemi’.
Spahia ka radhitur edhe një sërë faktorësh për të cilët mund të ishte përdorur për mirë situata e karantinimit, ndërsa izolimi sipas tij nuk është mënyra e vetme në përballimin e situatës, teksa shtoi se nuk mund të zgjasin këto masa deri në largimin e pandemisë.
“Ky virus mund të ketë qenë prezent edhe në Shqipëri në mesin e Janarit për shkak të prezencës së shqiptarëve në rajonet më të prekura në Itali. Kjo provohet së fundmi edhe përmes publikimit të grafikave të gripit sezonal, ku 62% të tyre rezultonin se edhe pse me simptoma të gripit sezonal, rezultonin jo si grip. Duke qenë se me të njëjtat simptoma por nuk ishte grip, lind pyetja se çfarë ishin? Pse nuk u morën masat? Pse nuk u testuan për Covid duke qenë se rreziku ishte shfaqur në vendet e tjera.
Nuk mund të kalohej një situatë e tillë me gjithë këto të dhëna dhe informacione për futjen e Covid-19 në Shqipëri. Me datë 2 Mars Rama tallej në Parlament ku deklaratat dhe shqetësimet tona i konsideronte si ‘infodemi’, apo edhe më 4 Shkurt ku pas deklaratës së OBSH deklaronte një informacion të rremë se nuk ka asnjë rast. Deklaratat e fundit edhe të përfaqësuesve të Komitetit Teknik të Ekspertëve hodhën poshtë deklaratat e kryeministrit ku thanë se koronavirusi mund të ishte prezent në vend që në mesin e muajit shkurt.
Qeveria vetëm menaxhim nuk ka pasur gjatë kësaj situate. Nuk di të ketë pasur një vendimmarrje përveç masave të vonuara dhe tepër të ekzagjëruara, në proporcion jo të drejtë. Ne kemi thënë vazhdimisht se nuk mund të përballeshim me këtë situatë pa masën masive të testimeve që sipas nesh, duhej të ishte shumë me serioze dhe e shtuar. Kjo pandemi nuk mund të përballohej vetëm me masat respektive të qytetarëve shqiptarë, natyrisht që këto masa mund të shërbenin për gjurmimin dhe testimin e popullatës.
Nuk mund të mbahen në karantinë qytetarët deri në përfundim të epidemisë, por mund të shfrytëzohet kjo periudhë për ta gjurmuar dhe identifikuar përhapjen e koronavirusit. Qeveria ka ngelur tek kjo masë të cilën e përballuan pavarësisht kushteve shumë të vështira, më së miri qytetarët shqiptarë.
Ne kemi vërejtjet dhe denoncimet tona për qeverinë dhe strukturat e saj. Sot dy muaj pas izolimit të plotë gjendemi pa asnjë informacion të qartë për shkallën e përhapjes së koronavirusit dhe përhapjes që do të shërbente edhe për izolimin e shpërndarjes. Mënyra e vetem për të pasur informacion do të ishin testimet e vazhdueshme, në mospasjen e këtij informacioni mbetet një enigëm e madhe përhapja e koronavirusit pas vendimit për të realizuar hapjen”, tha Spahia.
