Luciano Spalletti nuk toleron hapa falsë. Në prag të ndeshjes delikate kundër Sampdorias në transfertën e Genoas, trajneri i skuadrës kryeqytetase e pranon se skuadra e kolegut Giampaolo mbetet një kundërshtar shumë i rrezikshëm. “E njoh Giampaon prej shumë kohësh. Nuk do të jetë një ndeshje e lehtë, por ne po kalojmë një moment të veçantë dhe nuk duhet të lëmë pikë rrugës. Duhet të kërkojmë me çdo kusht fitoren në Marassi”.
Trajneri toskan nuk i druhet përgjumjes së skuadrës së tij, por beson se tensioni që ekipi do ta mbajë të karikuar në çdo moment. “Lojtarëve të mi u kërkoj ta shijojnë çdo ndeshje në maksimum, sepse kjo është mënyra ime e të punuarit. Është shumë e rëndësishme që skuadra të ruajë ekuilibrin në çdo ndeshje. Nuk duhet të pësojmë gola dhe besoj se kemi punuar mirë në mbrojtje gjatë ndeshjeve të fundit”, u shpreh Spaleti.
Në fund, Spalleti bën me dije se Florenzi do të rikthehet në stërvitje gjatë javës tjetër, ndërsa e pranon se Salah i mungon shumë skuadrës për shkak të aktivizimit të tij në Kupën e Afrikës me Egjiptin.
Ndërkohë, Milani ka nevojë urgjente për pikë, pasi renditja aktuale mbetet e ngjeshur dhe një tjetër hap fals do ta dëmtonte shumë skuadrën kuqezi. Grupi i drejtuar nga Montella do të luajë këtë të dielë në transfertën e Udines për të fshirë zhgënjimin e disfatës ndaj Napolit. “Pas fazës së parë kemi arritur të ndërtojmë filozofinë tonë dhe jemi më të bashkuar. Udinese është një skuadër e rrezikshme në kundërsulm dhe duhet të jemi të kthjellët për të dalë me një rezultat pozitiv”, tha Montela.
Montella beson se sezoni i Milanit fillon nga Udinese, duke kërkuar të fshijë zhgënjimin e dy sfidave të fundit. “Kamionati jonë nis këtu. Duhet të jemi perfektë në Udine, por jo domosdoshmërisht spektakolarë. Duhet të luajmë një ndeshje shumë të matur. Locatelli dhe Donarouma duhet të jenë të qetë dhe të ruajnë gjakftohtësinë”, tha ai.
Gjatë 5 javëve të fundit, Milani ka grumbulluar po kaq pikë, por Montella beson se grupi i tij është rritur shumë krahasuar me fillimin e sezonit, ndërsa në fund të konferencës për shtyp shton se, Deulofeu do të jetë një forcë e shtuar në skuadrën e tij.
