Sevilla “fundosi” Jose Mourinhon. Skuadra andaluziane mposhti 2-1 Manchester United në “Old Trafford”, duke e eliminuar në fazën e 1/8-ave të finaleve të Champions League.
Në Britani, mediet nuk i kanë kursyer aspak kritikat në drejtim të trajnerit portugez, që për më tepër u bë viktimë edhe e një lufte verbale me De Boer, të cilin e përkufizoi si trajnerin më të dobët në Premier League, me holandezin që nuk ngurroi t’i kundërpërgjigjej, duke thënë ka shpenzuar miliona euro për të bërë skuadrat e tij të luajnë futboll të varfër.
Sezonin e kaluar, “djajtë e kuq” fituan “Community Shield”, “FA Cup” dhe “Europa League”, ndërsa këtë vit, pas 365 milionë euro investimesh pritej diçka më shumë prej kësaj skuadre.
“Djajtë e kuq” kanë paguar 120 milionë euro për Pogbanë, 85 milionë për Lukakun, 45 për Matiç, 40 për Alexis Sanchez, 38 për Bailly, 35 për Lindelof dhe 42 për Mkhitaryan, me këtë të fundit që nuk është më pjesë e kësaj skuadre. E të gjitha këto investime u shoqëruan me ikjen në raundin e parë të përballjeve me eliminim të drejtpërdrejtë të kompeticionit më të madh futbollistik në Europë për klube.
Por, kjo është vetëm maja e ajsbergut. Në kampionat, Manchester United është 16 pikë larg kryesuesve të Manchester Cityt, me këtë të fundit që mund të fitojë matematikisht titullin e Premier League ekzaktësisht në derbin me United.
Ndërsa në Kupën e Ligës, “Djajtë e kuq” u turpëruan nga Bristol City, me këtë të fundit që i eliminoi në çerekfinale. Mundësia e fundit për Manchester United dhe Mourinhon për të shpëtuar sezonin është “FA Cup”, ku përballë në çerekfinale do të jetë Brighton.
“Vrasësi” i Manchester
Sevilla sot e ka një hero. Jo, nuk është Vincenzo Montella. Ose të paktën, jo vetëm. Wissam Ben Yedder është njeriu i ditës, figura e tij është në të gjitha faqet e para të mediave të botës dhe nëse Sevilla ka mundur të arrijë në çerekfinale të Ligës së Kampionëve për herë të parë në historinë e saj, merita është kryesisht e tij. Dopieta e mbrëmshme në “Old Trafford” është vetëm pika më e lartë, të paktën deri më tani, e një rruge të shenjuar nga golat e tij. 6 golat në fazën e grupit iu shtohen edhe dopieta e së martës në portën e De Gea, çka e projekton atë të dytin, të vendosur në renditjen e golashënuesve më të mirë të Championsit, në këtë sezon, deri më tani, vetëm pas Cristiano Ronaldos.
Por, Ben Yedder nuk ishte futbollist deri para pak vitesh. Dhe futbolli, i kuptuar si loja që luhet 11 kundër 11, nuk ishte as dashuria e tij e parë. I lindur në Sarcelles, në veri të Francës, Wissam i ri kishte zgjedhur futbollin “pesë kundër pesë”, një sport që, siç e dëgjojmë shpesh, me “11 kundër 11” të futbollit ka vetëm disa rregulla. Janë sporte të ndryshme, taktike dhe fizike. Disa gjëra themelore janë të ngjashme, shumë të tjera janë absolutisht të ndryshme dhe kjo e bën pothuajse të pamundur arritjen e niveleve të shkëlqyera në të dyja sportet.
Për këtë arsye, është e rrallë, për të mos thënë e pamundur, të shohësh kampionët e futbollit “5 kundër 5” të të dominojnë edhe në futbollin “11 kundër 11”, dhe anasjelltas. As Falcao, ndoshta përfaqësuesi më i lartë i “Futsal”, nuk arriti ta braktisë, pas disa paraqitjeve, aventurën e tij me fanellën e San Paolo. Ben Yedder, në anën tjetër, e bëri atë. Ndoshta i ndikuar nga prania e një prej klubeve historike të futbollit, disa kilometra larg shtëpisë, Ben Yedder qëndroi në “futsal” dhe në moshën 18-vjeçare arriti në ekipin kombëtar.
Megjithatë, me kombëtaren franceze të minifutbollit, ai do të kishte kohë të luante vetëm dy ndeshje, para se të vendoste, në mënyrë pak befasuese, për të provuar futbollin e madh, që luhet “11 kundër 11”. Një zgjedhje e çuditshme: braktisni majat e një sporti, në të cilin tashmë kishte arritur nivelet më të larta, për të filluar futbollin e madh nga zeroja. Zgjedhja, megjithatë, e shpërblen atë. Aventura e tij e parë në futbollin e madh e sheh me Alfortville, në “Championnat de France Amateur”. Rregullorja lejon anëtarësimin e dyfishtë, kështu që, të paktën fillimisht, Ben Yedder nuk hoqi dorë nga dashuria e tij e parë, “futsal”.
Cilësitë e tij, megjithatë, janë, nëse është e mundur, edhe më të lartësuara nga hapësirat e dhëna nga futbolli “11 kundër 11”, ndaj në kohë të shkurtër mbërriti ftesa e Toulouse. Në atë pikë, zgjedhja është më e thjeshtë: Ben Yedder braktis “parketin” dhe i kushton trupin dhe shpirtin e tij sportit më popullor në botë.
Nga “Toulouse 2” në ekipin e parë të Toulouse, tranzicioni është i shkurtër: golat arrijnë rregullisht, gjithsej 63, 62 prej të cilëve në katër sezonet e fundit në Ligue 1. Kërcimi në La Liga zhvillohet menjëherë më pas, me Sevilla, e cila, e impresionuar nga sulmuesi i gjithanshëm, që mund të kombinojë në mënyrë të përkryer shpejtësinë, teknikën dhe ndjenjën e golit, jep 9 milionë euro për ta marrë atë në Spanjë, ku historia fantastike e Ben Yedder vazhdon dhe arriti mbrëmë një kulm të paparë e të paharrueshëm. Kulm historik për Sevilla, çerekfinalet e Ligës së Kampioneve.
