Ministria e Energjisë dhe Industrisë është detyruar të anulojë koncesionin për hidrocentralin Bushtrica 4 për shkak se kuota ku ishte parashikuar të ndërtohej ky HEC prekte Parkun Kombëtar Shebenik-Jabllanicë. Madje një nga nënzonat më të mbrojtura ajo e Rrajcës, që është futur në hartën e UNECSO si pjesë e Trashëgimisë Botërore duket se ka shërbyer edhe si nxitje për të mos vijuar më tej. Detajet i bëri të ditura vetë Ministria e Energjisë në njoftimin e anulimit të këtij koncesioni. “Drejtoria e koncesioneve, prokurimeve, shpronësimeve dhe privatizimit vendim Nr. 3 datë 16/8/2017 për aulimin e procedurës “dhënie me koncesion e hidrocentralit Bushtrica 4” Në mbështetje të Ligjit nr. 125/2013 “Për koncesionet dhe partneritetin publik privat” i ndryshuar, Nenit 24 të Ligjit nr. 9643 datë 20.11.2006 “Për prokurimin publik” i ndryshuar, VKM nr. 575 datë 10.7.2013 “Për miratimin e rregullave për vlerësimin dhe dhënien me koncesion/partneritet publik privat”, i ndryshuar, për arsye se: Zona e parashikuar për zhvillimin e projektit në kuotat 1336-820 m.m.n.d në Lumi Bushtricës, sipas koordinatave përkojnë brenda territorit të Parkut Kombëtar Shebenik – Jabllanicë, ku një pjesë e mirë bie edhe në zonën e përcaktuar si Nënzonë Qendrore e Rrajcës, me shkallën më të lartë të mbrojtjes dhe së fundmi edhe me zonën pyjore që u shpall nga UNESCO si pjesë e Trashëgimisë Botërore të Natyrës. Si rrjedhojë, referuar Ligjit për Zonat e Mbrojtura datë Nr. 81/2017, datë 04.05.2017, Neni 16, pika 2 gërma (c) nuk mund të lejohet asnjë lloj aktiviteti njerëzor. Vendos: Anulimin e procedurës konkurruese “Dhënie me koncesion e hidrocentralit “Bushtrica 4””, thuhet në njoftimin zyrtar.
