Thibaut Courtois nuk arriti të luante titullar në një nga ndeshjet më delikate të sezonit për Chelsea-n, atë në transfertën e Manchesterit ku skuadra e Kontes u mund 2-0 dhe rihapi çështjen e titullit. Edhe pse në pamje të parë nuk ka asgjë të dyshimtë me të dëmtuarin e portës së “Bluve”, mediat belge gërmojnë më thellë dhe zbulojnë arsyen e dëmtimit që është deri diku qesharake. Sipas të dhënave, numri 1 pësoi tërheqje në kavilje gjatë xhirimeve për një spot publicitar. Courtois bashkë me shokët e skuadrës, Ake, Matic, Begovic e Alonso po xhironin për llogari të NBA një spot publicitar që synon rritjen e tregut të shikuesve në Kinë. Pas hedhjes në një moment ai e mbështeti keq këmbën dhe tashmë rrezikon të mungojë edhe në gjysmëfinalen e FA Cup kundër Tottenhamit, e planifikuar për t’u zhvilluar të shtunën. Një dëmtim që me siguri nuk i ka pëlqyer aspak trajnerit Antonio Konte. Italiani gjithsesi e pranoi se humbja e dytë në 4 ndeshjet e fundit erdhi vetëm për fajin e tij dhe shtoi se Manchester United e meritoi fitoren. Humbja e dytë në 4 javët e fundit gjithsesi nuk e alarmon italianin që tashmë ndien “frymën” e Tottenham me vetëm 4 pikë distancë. “Po zhvillojmë një sezon të jashtëzakonshëm, por kampionati po bëhet më i vështirë edhe pse nuk mund të konsiderohej i mbyllur edhe 5 javë më parë”, thekson Konte. Në krahun tjetër, Jose Murinjo nuk dha shumë sqarime në lidhje me uljen e Ibrahimoviç në stol, duke theksuar se ishte një zgjedhje e tij.
