Zinedine Zidane është shpallur për herë të dytë kampion i ligës elitare të futbollit në Spanjë, La Ligës, si trajner i Real Madridit.
Trofeu i La Ligës, të cilin Real Madridi e siguroi të enjten falë fitores 2:1 kundër Villarrealit në Santiago Bernabeu, ishte trofeu i 11-të i Zidane në 209 ndeshje të zhvilluara si trajner i Real Madridit, transmeton Gazeta Express.
Këto statistika bëjnë që Zidane ta mbajë një rekord të paarritshëm deri tash nga trajnerët e tjerë: Ai ka fituar trofe në mesatarisht çdo 19 ndeshje të zhvilluar si trajner i Real Madridit.
Për dallim, trajneri më i suksesshëm në histori të gjigantit madrilen, Miguel Munoz, i kishte fituar gjithsej 14 trofe gjatë karrierës së tij në Real Madrid, që kishte zgjatur për 605 ndeshje.
Nga top pesë trajnerët më të suksesshëm në historinë e Real Madridit, vetëm njëri prej tyre nuk kishte qenë edhe lojtar i Los Blancos para se të pensionohej nga karriera si futbollist.
Munoz, Zidane, Vicente del Bosque dhe Luis Molowny të gjithë e kishin përfaqësuar Real Madridit edhe gjatë karrierës si lojtarë, ndërsa vetëm Leo Beenahakker nga top pesë trajnerët nuk hyn në këtë mes.
Munoz, Molowny, Del Bosque dhe Zidane e kanë fituar trofeun e La Ligës dhe si lojtarë e edhe si trajnerë në Real Madrid.
