Nga Izmira ULQINAKU
Në fillim nuk e besova për një informacion të vërtetë, por kur pati edhe konfirmim mediatik u habita (megjithëse cfarë nuk po na habit këtë kohë!?).
Grupin e mjekëve, të vendosur pranë pikës së kalimit kufitar të Hanit të Hotit, portës kryesore tokësore që lidh Shqipërinë me Evropën, e kanë larguar. Tani mund të hyjë pa u kontrolluar kushdo që është bartës i virusit covid-19.
Në një situatë të tillë jemi vetëm në dorën e bartësit, nëse do të ketë mirësinë të vetëdeklarohet se është i tillë dhe se do të vetëkarantinohet. Cfarë absurdi!
A e imagjinoni, ai (kryeministri) që na e shet prej pesë javësh terrorin si masë për të mirën tonë, ai që luan me ne lojën e orareve të lëvizjes si “hapet bushiqi – mbyllet bushiqi”, ai që na cakton ditët se kur duhet të dalin pleqtë e kur duhet të dalin nënat me fëmijë, ai që zgjidhjen e situatës na e kujton cdo ditë përmes FB vetëm me tre fjalë: gjobë- ndalim-burg, paska hequr ekipin mjekësor nga pika kufitare e Hanit të Hotit.
Ky është shembulli më i qartë se cfarë keqmenaxhimi i është bërë dhe po i bëhet kësaj situate, ku më shumë se me virusin po përballemi me këtë perversitet kryeministror.
Kjo është një prej “masave” që Kryeministri ka marrë për Shkodrën, që t’i dalë “bombë me sahat” ashtu sic do dhe po kërkon, ndryshe nuk ka sesi shpjegohet mungesa e vazhdueshme e tamponëve, mungesa e masave dhe veshjeve mbrojtëse për personelin shëndetësor të spitalit të Shkodrës, fshehja e të dhënave etj.
Ajo cfarë nuk ka harruar të na tregojë gjithnjë është hakmarrja ndaj njerëzve të lirë, e këtë Shkodra e di mirë prej vitesh.
#EdiRamaDuhetLarguarSaMePare
