Kryetari i PD, Lulzim Basha u ka bërë thirrje operatorëve turistikë që janë goditur rëndë nga kriza e Covid-19, që të bëhen bashkë dhe të kërkojnë mbështetje nga qeveria, të kërkojnë drejtësi, jo lëmoshë. Basha tha se, duhet tw bwhet një trajtim të paktën sa ç’e kanë operatorët në Malin e Zi e Maqedoni.
Basha ishte sot në Lezhë dhe në Shëngjin, prej nga shprehu solidaritetin e tij total me operatorët turistikë.
“Ne e dimë se kështu nuk ndihmohet turizmi, por i jepet një goditje dërrmuese ekonomisë, e cila ndodhet në një krizë të thellë ndaj është e domosdoshme të kemi një ndryshim të thellë përsa i përket përqasjes ndaj ekonomisë në tërësi dhe turizmit në veçanti.
Koha është e bukur, por realiteti është i trishtë. Ky është realiteti, pa zbukurime, pa propaganda, pa regji qëndrore.
Ky është një dështim i paprecedentë, është një braktisje kriminale që i bëhet ekonomisë.
Është një mësim i madh jo vetëm për qeverinë që do të vijë por për këdo tjetër që do të vijë.
Për turizmin, PD parashikon në planin e saj ekonomik një mbështetje të shumanshme. Por ne e dimë që kjo situatë nuk do të ndryshojë brenda javës. Ndaj thirrja ime ndaj të gjithë operatorëve turistikë është të bëhen bashkë dhe të kërkojnë të drejtën e tyre.
Keni 20 vjet, 30 vjet që paguani taksa dhe është koha të kërkoni drejtësi. Jo lëmoshë, drejtësi, një trajtim të paktën sa ç’e kanë operatorët e Malit të Zi, të Maqedonisë, nuk po them të Greqisë”, u shpreh Basha.