Rreth 600 hektarë, kryesisht pyje dhe kullota janë djegur në 6 bashkitë e Qarkut të Gjirokastrës, ku zona më e prekur ka qenë Bashkia Dropull. Drejktuesit e strukturave të shtetit e pranojnë gjendjen e rëndë nga zjarret por nuk kanë marrë asnjë amsë parandaluese. Prefekti i Gjirokastrës, Flamur Bime tha gjatë një takimi të Shtabit të Emergjencave se këtë vit situata e zjarreve në Qarkun e Gjirokastrës ka qenë më shqetësuese dhe rreziku mbetet i lartë dhe për periudhën në vijim. Bime tha se, zjarri është krim i rëndë dhe se zjarrvënësit e qëllimshëm duhen ndëshkuar.
Sipas të dhënave të Policisë së Gjirokastrës, këtë vit janë shoqëruar 30 persona të hetuar për zjarrvënie, dy janë ndaluar dhe 5 ndiqen në gjendje të lirë. Sipas policisë, mes personave të hetuar për zjarrvënie tre kanë qenë gra.
Shefi i Repartit të Zjarrfikësve, Kujtim Bizhga tha se edhe këtë vit barinjtë janë shkaktari kryesor i zjarreve. Sipas Bizhgës, këtë vit temperaturat e larta kanë favorizuar zjarret. Repartet e ndërhyrjes nuk kanë mundur të përballojnë dinamikën e zjarreve në disa vatra njëherësh, bën të ditur shefi zjarrfikës, ndërsa shton se kjo ka ndodhur për shkak të burimeve njerëzore të kufizuara dhe mjeteve të pakta. Sipas zyrtarëve lokalë, repartet zjarrfikëse kanë nevojë edhe për përmirësimin e mjeteve zjarrfikëse, pasi janë shumë të vjetra.
Shtohet prania e zjarreve, 14 vatra të reja
Shtohen vatrat e zjarrit në disa qarqe të vendit. 14 vatra të reja zjarri janë shënuar gjatë 24 orëve të fundit në të gjithë vendin. Situata më e vështirë paraqitet në Jug të vendit, ku flakët e zjarrit vijojnë të shkrumbojnë qindra hektarë me pyje dhe kullota. Në të shumtën e rasteve zjarret janë të qëllimshme.
QARKU SHKODËR
Në fshatin Vig, Bashkia Vau Dejës ka rënë zjarr në shkurre dhe ferra pranë banesave, i cili më pas është përhapur në një pyll me pisha. Forcat zjarrfikëse dhe punonjës të pyjores kanë punuar për të izoluar dhe shuar flakët, dhe operacioni është në vazhdim. Si pasojë është djegur një banesë pranë vatrës së zjarrit, 20 koshere me bletë dhe një sipërfaqe relativisht e madhe në pyllin me shkurre dhe pisha.
QARKU KUKËS
Në fshatin Nimçe, Bashkia Kukës ka rënë zjarr në shkurre dhe pisha. Zjarri është shuar nga punonjës bashkiakë dhe banorë të zonës, duke mos lejuar shkaktimin e dëmeve ekonomike.
QARKU LEZHË
Në fshatin Selitë, Bashkia Mirditë ka rënë zjarr në shkurre dhe ferra pranë një pylli me pisha. Zjarrfikësit me mjete kanë punuar duke izoluar zjarrin që të mos prekej pylli me pisha.
Në fshatin Orosh, Bashkia Mirditë ka rënë zjarr në shkurre dhe ferra pranë pyllit me pisha. Zjarrfikësit me mjete kanë punuar për të izoluar zjarrin që ende rrezikon të kalojë në pyllin me pisha. Priten të shkojnë në ndihmë forca të ushtrisë.
QARKU TIRANË
Në fshatin Sineballaj, Bashkia Rrogozhinë ka rënë zjarr në një sipërfaqe me shkurre dhe pemë akacie. Zjarrfikësit me mjete kanë shuar zjarrin. Si pasojë e zjarrit u dogj një sipërfaqe prej rreth 0.5 ha me shkurre dhe 3 pemë akacie.
QARKU FIER
Në fshatin Darëzezë, Bashkia Fier ka rënë zjarr në një sipërfaqe me shkurre dhe pisha. Zjarrfikësit me mjete kanë shuar zjarrin. Si pasojë e zjarrit u dogj rreth 0.1 ha me shkurre dhe pisha.
Në fshatin Shtyllas, Bashkia Fier ka rënë zjarr në shkurre dhe kallama pranë një ullishteje. Zjarrfikësit me mjete kanë shuar zjarrin. Si pasojë e zjarrit u dogj rreth 0.4 ha me shkurre dhe kallama.
QARKU VLORË
Në fshatin Janicat dhe Cerkovicë, Bashkia Finiq, zjarret kanë marrë përmasa të mëdha, duke rrezikuar seriozisht banesat e këtyre dy fshatrave. Punonjës të Bashkisë Finiq kanë punuar me mjete rrethanore për të izoluar zjarrin e rënë në terrenin tepër të thyer, por flakët të favorizuara nga era kanë dalë jashtë kontrollit. Në vendngjarje kanë shkuar forca zjarrfikëse me mjete e forca ushtarake dhe të gjithë së bashku kanë bërë të mundur izolimin e vatrave të zjarrit, duke shmangur rrezikun për banesat e dy fshatrave.
Në fshatin Kudhës të Bashkisë Himarë ka rënë zjarr në pyllin me shkurre, mare, pemë frutore dhe ullinj. Zjarrfikësit nuk kanë mundur të ndërhyjnë me mjete për shkak të terrenit tepër të thyer, por kanë punuar me mjete rrethanore për të mbrojtur banesat. Zjarri në këtë zonë pyjore nuk është shuar plotësisht dhe kërkon ndërhyrje nga ajri.
QARKU BERAT
Në fshatin Kutalli, Bashkia Ura-Vajgurore ka rënë zjarr në shkurre dhe ferra. Zjarfikësit me mjete, të mbështetur edhe nga forca ushtarake, kanë izoluar zjarrin, duke eliminuar rrezikun për banesat e fshatit. Si pasojë e zjarrit u dogj sipërfaqe e madhe me shkurre dhe ferra.
QARKU GJIROKASTËR
Në fshatin Hormovë, Qendër Tepelenë ka rënë zjarr në shkurre dhe kullotë. Në vendngjarje kanë shkuar zjarrfikësit me mjete, duke izoluar vatrat e zjarrit. Si pasojë e zjarrit u dogj një sipërfaqe relativisht e madhe me shkurre dhe kullotë.
Në fshatin Shtëpëz, Picar, Bashkia Gjirokastër është riaktivizuar një vatër zjarri në vendin e quajtur “Shkalla e Zezë”, që nisi të merrte drejtim nga banesat e fshatit. Në vendngjarje kanë shkuar zjarrfikësit me mjete, të mbështetur nga forca ushtarake dhe forca të pyjores. Zjarri është izoluar, por nuk është shuar plotësisht. Si pasojë e zjarrit u dogj sipërfaqe e madhe me shkurre dhe kullotë.
QARKU KORÇË
Në kufirin ndarës mes njësive Lekas dhe Voskopojë, të Bashkisë Korçë ka rënë zjarr masiv në një pyll me pisha të larta. Në terren janë forca të zjarrfikëses dhe forca ushtarake të mbështetura nga helikopteri, dhe operacioni është në vazhdim dhe paraqet vështirësi ndërhyrjeje për shkak të terrenit të thepisur.
Në fshatin Leshnje, Barmash, Bashkia Kolonjë ka rënë zjarr në shkurre, pisha dhe ah. Në vendngjarje kanë punuar zjarrfikësit të mbështetur nga forca të pyjores dhe të Policisë Kufitare, duke shuar zjarrin. Si pasojë e zjarrit u dogj rreth 0.3 ha me shkurre, pisha dhe ah.
Zjarri rrethon nënstacionin e Fushë Krujës
Situata nga rënia e zjarreve ka dalë jashtë kontrollit në Fushë Krujë. Bëhet e ditur se flakët e zjarrit kanë rrethuar nënstacionin e Fushë Krujës dhe punonjësit e emergjencës janë duke punuar me të gjitha mjetet për të mos lejuar të hyjë brenda tij. Për të shmangur rrezikun për jetën e njerëzve dhe të objektit, OSHEE njofton se ka stakuar energjinë në nënstacion. Fushë Kruja dhe Kruja tani nuk kanë furnizimin me energji deri në normalizimin e situatës.
