Heshtja si përgjegjësi direkte e dhunës shtetërore!

Nga Bardh SPAHIA

Përsëritja e dhunës së policisë edhe ndaj intelektualëve, po dëshmon se frymëzuesit e këtij modeli janë ende në funksion dhe vazhdojnë me frymën e kundërvënies së policisë ndaj qytetarëve.

Katër intelektualë të rinj Astrit Seranaj, Donald Martini, Ergys Mertiri dhe Gentian Hasani, secili i spikatur në fushën e vet, por edhe qytetarë aktivistë, pjesë e Aleancës për Mbrojtjen e Teatrit u shoqëruan dhe u dhunuan mbrëmë në polici. U fshihen pamjet filmike përmes të cilave kishin regjistruar abuzimin e policëve dhe dhunohen nga policë brenda ambienteve të komisariatit nr.1 ku u shoqëruan.

Shenjat e dukshme fizike dhe dëshmitë e tyre për dhunën e policisë janë përcjellë në cdo media, por pushteti hesht: hesht kryeministri, sic bëri pas vrasjes së 25 vjecarit nga një polic i shtetit; hesht drejtori i policisë së shtetit, dorëheqja e të cilit u kërkua për shkak të vrasjes së 25 vjecarit; hesht edhe ministri i ri i brendshëm, që zëvendësoi paraardhësin e larguar për shkak të dhunës policore.

Eshtë skandaloze që policia po përdoret si mjet dhune ndaj qytetarëve në emër të pushtetit! Frika e Edi Ramës nga revolta e qytetarëve të cdo moshe, po krijon precedentin e rrezikshëm të mosbesimit ndaj policisë, institucioni që në këto 3 dekada pluralizëm ka patur dhe ka nevojë për besim të gjerë publik. Eshtë e turpshme sesi militantë me uniformë policore janë verbuar aq shumë sa nuk e kuptojnë dëmin e madh që i bëjnë gjithë shoqërisë! Dhuna në komisariate, e dëshmuar edhe nga minorenë e të rinj të shoqëruar më herët, nuk mund të anashkalohen.

Heshtja i bën bashkëpunëtorë, të parin kryeministrin, ministrin e ri të brendshëm e më pas, atë që ka përgjegjësi direkte për sjelljen e policëve, drejtorin e përgjithshëm të policisë së shtetit!

11 8