Prokuroria kërkon “arrest me burg” për vëllain e shefit të policisë

Prokuroria e Tiranës ka kërkuar masën e arrestit me burg për 7 personat e arrestuar në kuadër të një operacioni të zhvilluar në disa qytete të vendit, ku mes tyre është dhe Pajtim Aga, vëllai i Robert Agës, i cili u shkarkua dy ditë më parë nga posti i shefit të qarkullimit rrugor në Dibër.

Personat ndaj të cilëve prokuroria ka kërkuar arrest me burg janë:

Edmond Rajta

Pajtim Aga

Shkëlzen Mazari

Devis Mija

Fatjon (Paulin) Dodaj

Marsida Piperi

Arjet Halilaj

Prokurori Robert Kote tha se prova më e fortë janë përgjimet dhe procesverbali i lëndës narkotike prej 32.5 kg kanabis në forme çokollate, ndërkohë që vendimi për këtë grup do të jepet gjatë ditës së nesërme.

Kujtojmë se Pajtim Aga dhe më herët është arrestuar dhe dënuar për trafikimin e një sasie kokaine, ndërkohë që vëllai i tij, Roberti ishte pjesë e përgjimeve të publikuara nga Bild.

Ai dyshohet se ka pasur rol aktiv në pazaret për blerjen e votave, ndërkohë që iu publikua dhe një bisedë ku i thoshte Saimir Tahirit se ishte ushtari i tij. (lexo edhe ketu lajmin).

I arrestuati Pajtim Aga njihet si biznesmes në qarkun e Dibrës. Sipas disa mediave, Pajtim Aga prej disa vitesh ka hapur një televizion kabllor që shpërndan sinjal të disa stacioneve në vendlindje.

Në shtator 2016, Pajtim Aga u arrestua nga Policia e Lezhës pasi iu gjetën 320 gramë kokainë.

Më pas në vitin 2018, Mateo Aga, 21 vjeç, djali i Pajtimit, pra nipi i Robertit u zhduk pa lënë gjurmë nga Maqellara. Familjarët e Mateos shprehën dyshimet se ai mund të jetë rrëmbyer.