Ish-ministri: Rama një provokator dhe polemist i nivelit të ulët! Mesazhi i SHBA për Prokurorinë

Ish-ministri i Jashtëm, Besnik Mustafaj komentoi nga studio e Neës 24 edhe deklaratat e sotme të Ramës ndaj Metës, të cilat i cilësoi si të ulëta dhe provokatore.

“Mu duk një Edi Ramë në vazhdimësi, brenda identitetit të tij politik, brenda sjelljes së tij publike. S’pati asgjë të re, i kënaqur me veten, me bilancet, euforik me të ardhmen dhe Rama një provokator dhe polemist i nivelit të ulët me presidentin e Republikës. Fjalori i tij për presidentin nuk përfshihet në gjuhën e shkencave politike por është një gjuhë parapolitike”, tha Mustafaj.

‘Dako non grata në SHBA, ish-ministri: “Nuk ka surprizë, akuzohet prej kohësh për korrupsion masiv

Mustafaj, duke komentuar në Neës24, vendimin e DASH për t’i ndaluar hyrjen në SHBA kryebashkiakut të Durrësit Vangjush Dako dhe familjes së tij, e shikon këtë vendim si jo surprizë sa i përket dyshimeve të ngritura nga Sekretari i Shtetit, por një lloj surprize për rrethanat.

Ai thotë se ky është një moment që prokuroria të tregojë se sa e pavarur është për të kuptuar nxitjen e DASH.

“Zakonisht në praktikën e vetë DASH do të thotë sektori konsullor deklaron refuzim vizash kur kërkohet një vizë. Në këtë rast nuk kemi një praktikë të zakonshme që Dako të ketë kërkuar vizë. Në këtë kuptim gjesti është i pazakontë. Në argumentin që jep DASH, dyshimet që shpreh nuk janë surprizë as për mua e as për opinionin publik shqiptar. Ka disa vjet që përmendet për korrupsion në përmasa shumë të mëdha. Në këtë kuptim nuk ka surprizë për dyshimet që artikulohen por një farë surprize për rrethanat që u bë ky lajm.

Dako është person non grata në SHBA. Nga ana diplomatike është një mesazh që i dërgohet prokurorisë. Në mënyrë publike mban një qëndrim ndaj një njeriu dhe familjes së tij. Penalizimi i familjes së tij është më kuptim sepse do të thotë që familja ka qenë përfituese. Në vlerësimet që ka ambasada amerikane këtu, DASH atje, familja ka qenë përfituese.

Pasi vepron drejtësia, një drejtësi e pavarur, profesionale dhe e drejtë atëherë DASH merr vendimet e veta por përgjithësisht është një periudhë që zgjat shumë.

Ne kemi një precedent që është precedenti me Adriatik Llallën. Ne do të shohim se sa do të jetë këmbëngulëse mbrojtja dhe sa do të jetë e pavarur prokuroria për të kuptuar nxitjen që i bën DASH”, deklaroi Mustafaj.