Shehaj: Për megaskandalin DH Albania ka vetëm një fajtor, Edi Rama!

Deputeti i Partisë Demokratike, Agron Shehaj shkruan se, “Zëri i Amerikës” po fakton lidhjet e shtetit me megaskandalin e DH Albania.
Në një status në Facebook, deputeti i djathtë shkruan se kryetare e komisionit të liçencimit që reagoi mbrëmë kundër VOA-s është një militante e thekur e PS.
“Kush mund ta kontrollojë Prokurorinë e Tiranës që ajo të mos arrestojë apo ndalojë asnjeri, mos sekuestrojë asnjë zyrë dhe asnjë dokument, të mos bllokojë asnjë aktivitet për këtë megaskandal? Vetëm një njeri: Edi Rama”, shkruan Shehaj.
Statusi i plotë i deputetit Shehaj
Zëri i Amerikës solli prova që tregojnë se një tjetër institucion shtetëror ka qënë i përfshirë në megaskandalin e DH Albania. Komisioni i licensimit të kompanive të ndërtimit, drejtuar nga një militante e thekur e Partisë Socialiste, Gerta Lubonja, ka filluar procesin e licensimit të DH Albania para se kompania të ekzistonte edhe në letër. Kush mund t’i urdhëronte ministër Gjiknurin, drejtoreshë Lubonjën e komisionit të licensimit, drejtor Qëndron e ARRSH-së, drejtor Gradecin e OST-së e dhjetëra funksionarë të lartë shtetërore që t’i jepnin dy tendera 40 milionë euro një kompanie fantazmë dhe një 26 vjeçar pa asnjë lidhje? Vetëm një njeri: Edi Rama. Kush mund ta kontrollojë Prokurorinë e Tiranës që ajo të mos arrestojë apo ndalojë asnjeri, mos sekuestrojë asnjë zyrë dhe asnjë dokument, të mos bllokojë asnjë aktivitet për këtë megaskandal? Vetëm një njeri: Edi Rama. Ai e ka në pjatë qeverinë edhe prokurorinë, për mengjes, drekë dhe darkë.