“France Football” zbulon sulmin e fshehtë të Real Madrid për Neymar

Që Neymar është një objektiv i Real Madrid nuk është aspak sekret. Braziliani është një prej emrave që Los Blancos kanë shkruar në listën e preferencave. Fillimisht ishte Barcelona, më pas PSG që prishën ëndrrën e Real Madrid, për të patur në ekip yllin brazilian. Gjithsesi, fakti që të dy, si Bale ashtu edhe Cristiano Ronaldo mund të largohen gjatë kësaj merkato vere nga Madridi, mund të shënojë edhe momentin e shumëpritur, atë të transferimit të Neymar te Galaktikët. Pikërisht në këtë kontekst, presidenti i Real Madrid, Florentino Perez, në tentativë për të bindur brazilianin ka thënë gjithmonë: “Neymar ka më shumë shanse të fitojë Topin e Artë te Real Madrid”.
Referuar raportimeve të medias gjigante sportive “France Football”, presidenti i Real Madrid, Perez është në kontakt të vazhdueshëm me babain e Neymar, që është njëherësh edhe menaxheri i futbollistit. Objektivi është që të dy ata të mund të bindin sheikun pronar të PSG, Nasser Al-Khelaïfi, që të pranojë transferimin e yllit të Brazilit. Gjithsesi nuk do të jetë një transaksion i thjeshtë, aq më pak i lirë, pasi vetëm një vit më parë, francezët shënuan blerjen më të shtrenjtë në historinë e futbollit, duke transferuar Neymar nga Barcelona për shumën rekord 222 milionë euro. Sipas raportimeve nga mediat e huaja, Real mund të thyejë rekordin e vendosur nga PSG, duke i ofruar këtij të fundit jo pak por plot 350 milionë euro për blerjen e Neymar.