Zbardhet Shqipëria, ja qytetet ku ka rënë më shumë borë

Reshjet e deborës kanë krijuar probleme edhe në qytetin e Shkodrës i cili është gdhirë këtë të martë i zbardhur nga dëbora. Reshjet gjatë natës ka krijuar probleme edhe brenda qytetit të Shkodrës sa i takon qarkullimit të mjeteve. Ndërkohë bashkia e Shkodrës ka nisur hedhjen e kripës në pak rrugë por ka probleme me rrëshqitjet. Blloku i lagjeve tek Stacionit i trenit , Hardhijat e egra dhe tre Heronjtë vazhdojnë të jenë në errësirë të plotë në qytetin e Shkodrës.
Ndërkohë situata mbetet tejet e vështirë në zonat malore. Rruga Qafë Thore – Theth është e bllokuar dhe dëbora ka arritur në trashësinë 2 metra. Gjithashtu është i bllokuar edhe Mali i Shoshit. Dukagjini në pjesën më të madhe është pa energji elektrike. Ndërsa në 3 njësi administrative nuk zhvillohet mësim. Mbi 70 cm dëborë është edhe në rrugën e Kelmendit dhe kërkohet përdorim i zinxhirëve.

Izolohen fshatrat e Krujës, në Diber pezullohet mësimi
Reshjet e 24 orëve të fundit kanë krijuar shumë probleme në zonat e thella malore të disa qarqeve të vendit. Dëbora ka izoluar 7 fshatra në Malësinë e Krujës, ndërsa 7 shkolla në zonën e Lezhës janë mbyllur dhe mësimi është pezulluar. Ndërkohë zonat e thella malore kanë probleme edhe me bazën ushqimore për bagëtitë.
Edhe në Dibër situata paraqitet problematike, pasi disa njësi administrative janë të bllokuara dhe mësimi është pezulluar pasi trashësia e dëborës ka shkuar deri në një metër.
Në qarkun e Dibërës vetëm rruga nacionale Peshkopi – Tiranë lëvizja e mjeteve bëhet me vështirësi, pasi të gjitha akset e tjera janë të bllokuara. Probleme ka edhe me ujin e pijshëm, ndërsa dy mijë miatorë nuk janë paraqitur sot në punë. Trashësia e dëborës në Peshkopi dhe Bulqizë ka arritur deri në 30 centimetër.

Probleme me rrugët
I ftohti i acartë ka sjellë me vehte edhe dëbroen që kësaj here ka pushtuar pothuajse të gjithë territorin e vendit. Në sasi më të madhe në zonat malore por ka patur reshje edhe në qytete bregdetare. Deri tani probleme ka por nuk janë shumë serioze. Rrugët kryesore janë të kalueshme, por ato rurale mbetën të bllokuara. Nga ana tjetër, shumë fshatra kanë mbetur pa energji elektrike. Ja si paraqitete gjendje deri në orët e para të mengjesit të sotshem në të gjithë vendin.
Kukës
Temperaturat zbritën disa gradë nën zero në Kukës.
Erërat e forta dhe stuhitë sollën probleme në qarkullim.
Rruga e Kombit mori një shtresë akulli, por është e kalueshme.
20 mjete borëpastruese janë në dispozicion.
Në zonat rurale janë të pakalueshme rrugët që lidhin Kukësin me Grykëcajen, Surrojn, Arren, Kalisin dhe Zapodin.
Por probleme pati edhe në qytet. Një pjesë e tubacioneve kanë ngrirë, ndërsa të hënën nuk u zhvillua procesi mësimor.
Dibër
Trashësia e borës në qytetin e Peshkopisë kalon 30 centimetra, ndërsa në zonat e thella, shkon në mbi 50 centimetra. Të gjitha rrugët e njësive administrative të Dibrës janë të bllokuara.
Rruga nacionale Peshkopi-Tiranë kalohet me vështirësi me zinxhirë. Problematike në këtë segment është Qafa e Moronicës, Pishat e Bulqizës, Qafa e Buallit dhe Qafa e Ulzës.
Rruga Peshkopi – Kukës kalohet me zinxhirë. Problem ngelet Kalaja e Dodës, ndërsa aksi Ura e Çerenecit – Stëbleve është i bllokuar. Po ashtu e bllokuar është edhe rruga Qafa e Buallit – Martanesh.

Korçë
Të gjitha rrugët nacionale në juglindje janë të kalueshme pa zinxhirë. Rruga drejt pikës turistike të Dardhës ka bllokime të herë pas hershme. Aty janë regjistruar 70 centimetra borë. Zonat e thella malore të Korçës, Devollit, Kolonjes, Pogradecit mbeten të izoluara.
Llogara
Në Llogara, lëvizja e mjeteve sidomos gjatë darkës bëhet me vështirësi për shkak të reshjeve të borës. Policia u bën thirrje drejtuesve të mjeteve, të cilët kanë intinerar zonën e Llogarasë, mjetet rrugore të tyre të jenë të pajisura me zinxhirë për qarkullim.
Elbasan
Reshjet e bores dhe era ka shkaktuar akull në shumë rrugë të Qarkut të Elbasanit. Vëmendja është përqëndruar në rrugën Elbasan-Qafthanë . Rruga që lidh Librazhdin me Bulqizën është i bllokuar. Fshatrat e thella malorë si Rrajca, Sopoti, Polisi, Stëbleva, Luniku, Orenja etj janë të bllokuar. E njëjta situatë edhe në fshatra të thella malorë të Gramshit si në Skëndërbegas, Lenie, Poroçan. Në disa fshatra ka mungesë të energjisë për shkak të këputjes së përcjellsave apo shembjes së shtyllave nga dëbora. Sikurse në disa shkolla nuk është bërë transporti i mësuesve dhe nxënësve.

Shkodër
Pas dy ditë reshjesh, bora e zbardhi qytetin e Shkodres. Por në rang qarku, nuk ka probleme të renda. Me përjashtim zona e thellë në Pukë, ku bora është shoqeruar me stuhi të fortë. Në disa zona në Qafë Mali, trashësia shkon 1.5-2m. Trashësia normale në gjithë këto zona është rreth 80 cm. Në Malësinë e Madhe vetëm disa rrugë, ato drejt Thethit dhe Boës bëhen me zinxhirë. Kurse në Qafë Mali-Fierzë, aktualisht ka rreth 40 cm borë