Vulin: Beogradi duhet të kërkojë ndarjen e Kosovës

In this photo taken Thursday, June 29, 2017, Serbian Defense Minister Aleksandar Vulin attends Government's swearing in ceremony at the Serbian Parliament building, in Belgrade, Serbia. Serbia's defense minister has reaffirmed his support for a convicted war criminal, denouncing the U.S. ambassador to Belgrade for his critical tweet. (AP Photo/Darko Vojinovic)

Ministri serb i Mbrojtjes, Aleksandër Vulin, tha të martën se, Serbia duhet të kërkojë ndarjen e Kosovës, ndërsa hodhi idenë që Beogradi të bisedojë me Tiranën dhe jo me Prishtinën.
Ai i bëri këto komente në një tryezë diskutimesh në kuadër të dialogut të brendshëm serb për çështjen e Kosovës, të cilin e ka hapur Presidenti serb, Aleksandër Vuçiç.
“Ndarja afatgjatë dhe e fortë ndërmjet shqiptarëve dhe serbëve duhet të ndodhë në Kosovë”, tha ai.
Ministri serb, nuk sqaroi se si do të mund të dukej ndarja e Kosovës, por idetë e tilla zakonisht kanë përfshirë Veriun e Kosovës të banuar me shumicë serbe, ku vazhdon kundërshtimi i shtrirjes së sovranitetit të Prishtinës.
Ideja e tillë ishte hedhur edhe më herët nga ministri i Jashtëm serb, Ivica Daçiç, por i cili kishte theksuar se kjo nuk është politikë e qeverisë së tij.
Presidenti serb, Aleksandër Vuçiç, ka theksuar disa herë se duhet të gjendet një zgjidhje për Kosovën, e cila nuk do të ishte e kënaqshme për asnjërën palë, por pa saktësuar se për çfarë zgjidhje bëhet fjalë. Ai hapi verën e kaluar një proces të dialogut të brendshëm për këtë çështje në Serbi, e cila aspiron të anëtarësohet në Bashkimin Evropian, por kusht themelor është normalizimi i marrëdhënieve me Kosovën.
Më ndërmjetësimin e Bashkimit Evropian, Kosova dhe Serbia ishin marrë vesh për krijimin e Asociacionit të komunave me shumicë serbe, që parasheh më shumë autonomi për veriun. Marrëveshja kishte nxitur shumë kundërshtime në Kosovë.
Beogradi vazhdon të kundërshtojë pavarësinë e Kosovës, që është shpallur dhjetë vjet më parë, me mbështetjen e Shteteve të Bashkuara dhe vendeve kryesore të Bashkimit Evropian.