Në polici vijon rrokada e mafias, oficeri i implikuar në trafik kokaine është arratisur

Partia Demokratike ka reaguar dje në lidhje me oficerin e Policisë së Shtetit, Julian Balliu, të implikuar në trafik kokaine. Sipas Arben Ristanit, Sekretar i Përgjithshëm i PD, Balliu është arratisur si tre kolegë të tjerë të akuzuar dhe masa e pezullimit ndaj tij ndërmarrë nga ministri i Brendshëm, Xhafaj është vetëm propagandë. Ristani ka denoncuar dje emërimet abuzive në Policinë e Shtetit, ndërsa ka deklaruar se në polici po ndodh rrokada e mafias, ku policët trafikantë të kanabisit, po zëvendësohen me policët trafikantë të kokainës. Më tej, Arben Rista thotë edhe për publikimet nga disa mediat lidhur me faktet e reja për çështjen e ish-ministrit Saimir Tahirit dhe oficerëve të policisë lidhur me çështjen e Habilajve. “Publikimi në disa media i lidhjeve të ish-ministrit të Brendshëm Saimir Tahiri dhe oficerëve të lartë të policisë me trafikun e drogës, janë faktet e reja që provojnë se në polici, nuk po ndodh vetting, por zëvendësimi i një kupole mafioze me një tjetër. Po ndodh rokada nga Habilajt te Xhafajt. Portali Politiko.al publikoi bisedën mes bandës së Habiljave, që bënin llogaritë e fitimeve të Saimir Tahirit nga trafiku i drogës. “5 milionë euro në muaj”, thotë Moisi Habilaj, që përdorte për trafik droge makinën e ministrit të Brendshëm. Me paratë që fitonte nga droga, Saimir Tahiri mund të shkonte në Hënë, sipas trafikantëve, por në fakt, paratë e drogës janë përdorur në fushatë elektorale nga Saimir Tahiri për të bërë Edi Ramën kryeministër”m shprehet Ristani. Ai deklaroi se me një drejtësi të pakapur nga krimi, Saimir Tahiri nuk do të shkonte në Hënë, siç thotë Habilaj, por thjesht në burg, duke marrë me vete edhe bosin e vet të vërtetë, Edi Ramën. “Emisioni “Fiks Fare”, zbuloi mbrëmë me zë dhe me figurë sesi një oficer i lartë në Policinë e Shtetit, Julian Balliu, është pjesë e krimit të organizuar që trafikon drogën më të shtrenjtë në treg, kokainën. Ky nuk është i vetmi oficer policie i përfshirë në organizitatat kriminale që trafikojnë drogë. Sipas raportit zyrtar të shërbimit sekret, 128 oficerë policie, përfshirë edhe drejtues të lartë të saj, kanë marrë pjesë dhe kanë përfituar nga trafiku i kanabisit. Deri tani nuk është bërë publike asnjë masë e marrë ndaj tyre, ndërsa tre drejtues të policisë në qarqe, të akuzuar për lidhje me Habilajt dhe Tahirin, janë në arrati. Urdhëri i ministrit të Brendshëm Fatmir Xhafaj, për pezullimin e oficerit të përfshirë në trafikun e kokainës është veç një nga masat propagandistike, sepse media raporton se Julian Balliu është arratisur, njësoj si tre drejtuesit e tjerë të lartë të policisë. Pezullimi nga Fatmir Xhafaj është propagandë, njësoj si vettingu që thotë se do të bëjë në polici vëllai i Agron Xhafës, që është dënuar për trafik ndërkombëtar kokaine. Partia Demokratike shpreh bindjen se pa largimin e Fatmir Xhafës dhe Edi Ramës, si koka që mbron krimin e organizuar në Shqipëri, nuk do të ketë vetting të vërtetë në polici dhe as rend dhe siguri për shqiptarët”, tha Ristani.