Shqipëria në prag të revoltës antimafia

Shqipëria po shkon drejt revoltave të mëdha “Antimafia”. Kapja e kreut të Prokurorisë në mënyrë antikushtetuese nga Rama me qëllim për të mbyllur dosjet e skandaleve të lidhjeve të qeverisë me krimin si dhe për ta përdorur politikisht Prokurorinë rrezikojnë të çojnë vendin në një përplasje të fortë.
Nga ora në orë priten vendime të rëndësishme të opozitës, ndërsa qëndrimet janë të qarta dhe të prera për të mos lejuar në asnjë mënyrë shkeljen e Kushtetutës që në rastin e një Prokurori politik do të çonte vendin drejt diktaturës.
Kryetari i Partisë Dmeokratike, Lulzim Basha paralajmëroi dje fundin e Reformës në Drejtësi dhe nisjen e diktaturës së vendit nëse sipas të gjitha gjasave në seancën e pritur të 18 dhjetorit, Rama do të miratojë me vetëm votat e tij Kryeprokurorin e Përgjithshëm dhe defacto kapjen e institucionit të organit të akuzës.
Deklaratat Basha i bëri gjatë qendrimit në Londër, ku ndodhej me ftesë të kryeministres britanike Theresa May.
Gjatë qëndrimit në Londër, Kryetari i Partisë Demokratike, Lulzim Basha, bashkëbisedoi me komunitetin shqiptar të Londrës. Aktualiteti në Shqipëri ishte në vëmendjen kryesore dhe pyetjet e tyre ishin për çështjen e kryeprokurorit, krimit të organizuar, fuqizimit të Partisë Demokratike.
Lidhur me çështjen e kryeprokurorit, Lulzim Basha e krahasoi vendimin e Edi Ramës për ta marrë nën kontroll drejtësinë me pushtetin absolut të mbretit, duke qenë vetë kryeministër, vetë gjyqtar, vetë xhelat.
Basha tha se, shqiptarët e kanë vuajtur këtë nën diktaturë dhe se opozita nuk do të pranojë kurrë që Edi Rama ta kthejë Shqipërinë në të njëjtën gjendje, ku një njeri i vetëm kontrollon me dorë të hekurt Parlamentin, qeverinë dhe drejtësinë.
“Ky është fundi i Reformës në Drejtësi dhe ky është hapi vendimtar i rrëshkitjes së vendit në diktaturë. Nëse në datë 18 dhjetor Edi Rama zgjedh me votat e tij kryeprokurorin, ky është fundi i shtetit ligjor, fundi i demokracisë dhe opozitës i lind detyra të japë përgjigjen e merituar”, tha Basha.
Kreu i opozitës tha se e vetmja rrugë për një drejtësi të reformuar kalon përmes zbatimit të Kushtetutës siç u miratua në 22 korrik 2016.
I pyetur për situatën e kriminalitetit, lidhjet e qeverisë me krimin dhe alternativën e Partisë Demokratike, Basha tha se, duke mbrojtur dhe promovuar kriminelët, Edi Rama e ka futur Shqipërinë në listën e zezë.
Lulzim Basha tha se, Partia Demokratike e ka treguar me prova, si në rastin e heqjes së vizave, se ka vullnet për ta luftuar krimin.
“Krimin do ta shtypim dhe Shqipërinë do ta bëjmë anëtare të Bashkimit Europian dhe shqiptarët nuk do të shkojnë më si refugjatë, por do të shkojnë të punojnë siç punojnë polakët, bullgarët, rumunët, me kokën lart me pasaportë shqiptare dhe të kenë të njëjtat të drejta si çdo qytetar europian. Ky është qëllimi im. Ky është objektivi që i kam vënë vetes”, tha kryetari Basha.
Me demokratët e Londrës kreu i opozitës diskutoi për demokratizimin e mëtejshëm të PD-së, në mënyrë që të tërheqë pranë vetes intelektualët dhe këdo që beson tek vlerat.
“Një prej këtyre vlerave është demokracia, tha Basha. Në Degën e PD-së Londër zbatohet parimi një anëtar një votë. Këtë formë duhet ta kemi në të gjithë PD-në”.
Basha përfshiu këtu edhe zgjedhjen e deputetëve demokratë. “Pavarësisht rrethanave të zgjedhjeve të këtij viti, e kam thënë që deputetët e ardhshëm të Partisë Demokratike do të vijnë sipas parimit një anëtar një votë”, tha Basha.
Kreu i opozitës u shpreh se, “do të bëjë përpjekje që ky parim të bëhet realitet që në zgjedhjet bashkiake, për ta testuar në 2-3 qytete të mëdha dhe për ta shtrirë pastaj në të gjithë vendin”.
Lulzim Basha tha se, Partia Demokratike është e vetmja forcë që mund të sjellë një ndryshim pozitiv për vendin dhe qytetarët, prandaj edhe beteja kryesore e saj është ajo për zgjedhje të lira e të ndershme.
Gjatë qendrimit në Londër, kryetari Basha u takua me parlamentarë dhe zyrtarë të lartë të qeverisë britanike dhe Foreign Office.
Lulzim Basha ndodhet në Londër me ftesë të Partisë Konservatore Britanike të Kryeministres Theresa May. Ai mori pjesë në konferencën mbi “Sfidat në Ballkanin Perëndimor”.
Konferenca e ardhshme e rrjetit të partive të qendrës së djathtë të Ballkanit Perëndimor dhe konservatorëve britanikë do të mbahet në Tiranë në mars 2018.