Berisha: Turizmi skandaloz në shtetin e Noriegës

Ish-kryeministri Berisha ka reaguar për ngjarjen e rëndë të ndodhur mëngjesin e djeshëm në plazhin e Velipojës, ku disa persona u plagosën si pasojë e shpërthimit të një cisterne gazi në një hotel turistik. Në një postim në rrjetin social “Facebook”, Berisha shkruan se, për shkak të mungesës së sigurisë, turizmi është kthyer në një sektor shqetësues. Duke iu referuar rasteve të regjistruara këtë verë, Berisha thotë se, janë mbytur 15 turistë në brigjet shqiptare.
“Turizmi skandaloz në shtetin e Noriegës!
Një shpërthim i fuqishëm i një cisterne gazi dhe një zjarr i madh në një hotel turistik, tronditi  mijëra e mijëra pushues në Velipojë. Nga ky shpërthim që mund të merrte shumë jetë, por duket se çisterna e madhe nuk ishte plot gaz, u dogjën rëndë tre qytetarë, të cilëve nga zemra ju urojmë shërim të shpejtë.
Por mund të thuhet se ky ishte një muaj skandaloz për turizmin shqiptar. Vetëm në ujërat e plazheve të vendit janë mbytur 15 turistë, dy herë më shumë se në të gjitha plazhet e Europës të marra së bashku, dhjetëra turistë të tjerë humbën jetën apo u plagosën në trafikun jashtë kontrolli të rrugëve të vendit.
Vrasja me mjetet ujore të mafies, e vajzës 15-vjeçare ruse dhe shpërthimi i ujërave të zeza në Ksamil (për shkak të BE thotë kryetarja siçiliste e Bashkisë së Sarandës), dërguan lajme skandaloze në mbarë botën.
Po të shtojmë këtu shërbimet skandaloze dhe çmimet marramendëse të pakontrollura, mungesa e energjisë elektrike dhe ujit të pijshëm, të gjitha këto përbëjnë një bilanc skandaloz të turizmit të një vendi pa zot dhe turpin e kësaj qeverie që noton në korrupsion”, shkruan Berisha.