510 kg drogë nga Shqipëria sekuestrohen në Greqi

Policia greke sekuestroi dje rreth 510 kg drogë në dy operacione. 382 kg kanabis sativa u sekuestruan në një kamion me pleh kimik që ishte nisur nga Shqipëria. Lënda narkotike u sekuestrua në Portin e Igumenicës, ndërsa policia greke ka vënë në pranga një 41-vjeçar. I arrestuari ka deklaruar se lënda narkotike do të dërgohej drejt Holandës ose Gjermanisë. Sasia e sekuestruar e drogës, ishte fshehur brenda një kamioni që transportonte pleh kimik dhe ishte e ndarë në 70 pako.
Trafiku i drogës nga Shqipëria drejt Greqisë vijon për çdo ditë. Të hënën u sekuestruan rreth 120 kg kanabis nga policia greke dhe u vunë në pranga dy transportuesit, ndërsa javën që shkoi u sekuestruan sasira të mëdha droge në tre operacione të policisë greke.
Po ditën e djeshme policia sekuestroi 128 kg marijuanë në Janinë. Operacioni u krye në Pogon të Janinës nga policia greke. Autoritetet fqinje ndaluan dy automjete, njëra prej të cilave bënte kontrollin e rrugës ndërsa tjetra ishte e ngarkuar me drogë. Në mjetin me drogë u gjetën dhe u sekuestruan në cilësinë e provës materiale 128 kg e 200 gram marijuanë. Ndërkohë në pranga kanë rënë dy persona, një 33-vjeçar shqiptar dhe një shtetas grek.
Para tre ditësh, policia greke sekuestroi rreth 223 kg drogë të futur nga Shqipëria dhe vuri në pranga 4 shtetas shqiptarë. Droga është sekuestruar në dy operacione të policisë greke. 121 kg marijuanë është kapur në pyllin e Vatohorit në zonën e Follorinës. Shqiptarët kishin kaluar kufirin në këmbë të ngarkuar me 7 çanta që përmbanin 100 pako me 121 kg 88 gram. Shqiptarët e arrestuar janë të moshës, 21, 26, 31 dhe 46 vjeç.
Në Portin e Igumenicës u kapën 102 kg marijuanë. Droga ishte në një kamion italian me drejtues një shtetas italian 51 vjeç. Lënda narkotike ishte ndarë në 92 pako, ndërsa destinacion kishte Italinë. Bëhet e ditur se, droga u zbulua nga qeni antidrogë “Lesi” i skuadrës K9 të policisë greke.
Policia greke sekuestroi të dielën një sasi droge në bregdetin e Katakolos. Mësohet se janë gjetur 5 pako me drogë në det, pranë Ilia-s në shtetin helen. Bëhet e ditur se, pakot përmbanin 28 kg marijuanë, ndërsa policia greke dyshon se droga mund të jetë pjesë e sasisë së hedhur nga gomonia që u ndoq të shtunën. Por nga ana tjetër nuk përjashtohet mundësia që kjo sasi të jetë e drogës së sekuestruar në 22 janar në bregun e Zakynthos, ku deri më tani janë gjetur edhe 60 kg të tjera, në 22 janar dhe 2 shkurt.