Haradinaj lirohet, por mbetet në Francë

Gjykata franceze ka marrë vendim që ta lirojë me kusht, Ramush Haradinajn. Vendimi është marrë të enjten në seancën dëgjimore për rastin Haradinaj, pas paraqitjes së kërkesës për ekstradim nga autoritetet e Serbisë dhe një kërkese të palës mbrojtëse për lirimin e tij.
Lajmin e ka konfirmuar për Radion Evropa e Lirë, avokati i Haradinajt, Arianit Koci. Autoritetet e drejtësisë në Serbi dorëzuan dy ditë më parë kërkesën për ekstradim të zotit Haradinaj me, siç thanë, akuzat e reja për “krime lufte në Kosovë në fundvitet ‘90 ndaj popullsisë joshqiptare”.
Pala mbrojtëse ndërkaq ka kërkuar lirimin e zotit Haradinaj bazuar në “gjykimin e përfunduar në Gjykatën për Krime Lufte në ish-Jugosllavi që ka trajtuar çështjet” që siç thotë “pretendon pala serbe”. Ramush Haradinaj u ndalua në aeroportin e Baselit nga autoritetet franceze mbi bazën e një urdhërarresti ndërkombëtar të lëshuar nga autoritetet serbe për, siç thuhet, “krimet e kryera gjatë luftës në Kosovë”.
Haradinaj u mbajt në paraburgim me vendim të një gjykate franceze, e cila tha se po kërkon nga autoritetet e Serbisë një kërkesë zyrtare për ekstradim. Autoritetet në Francë thonë se rasti nuk ka “implikime politike” meqë po trajtohet nga organet e drejtësisë franceze dhe kanë pohuar faktin se kanë qenë në kontakt të vazhdueshëm me autoritetet në Kosovë për çështjen Haradinaj.
Në Kosovë ndërkaq, udhëheqës të institucioneve kanë kërkuar zyrtarisht nga Franca lirimin e Haradinajt dhe “janë zotuar për zbatim të masave të reciprocitetit ndaj Serbisë” nëse urdhërarrestet që datojnë nga fillimi i viteve 2000 nuk tërhiqen.
Qeveria e Kosovës mori vendim ndërkaq javën e kaluar që t’ia ndalojë hyrjen në Kosovë presidentit të Serbisë, Tomisllav Nikoliç dhe zyrtarëve të tjerë në Ditën e Krishtlindjeve ortodokse.
Marrëdhëniet ndërmjet palëve ranë në nivelin më të ulët që prej fillimit të bisedimeve në Bruksel të lehtësuara nga BE-ja, e cila sërish ka bërë thirrje për “vazhdimin e dialogut për normalizimin e marrëdhënieve dhe bashkëpunim në të gjitha fushat”.

Serbia nuk komenton vendimin e Francës

Pas vendimit të drejtësisë franceze për lirimin me kusht të ish-kryeministrit të Kosovës, Ramush Haradinaj, ministri i Jashtëm dhe zëvendëskryeministri serb, Ivica Daçiç ka thënë se qeveria e Serbisë, nuk do të deklarohet rreth këtij rasti.
Televizioni shtetëror serb, “RTS” raporton se kryeministri Aleksandar Vuçiç e ka thirrur një mbledhje të qeverisë serbe për të premten gjatë të cilës do të dilet me një qëndrim.
Ish-kryeministri i Kosovës dhe një nga ish-komandantët e Ushtrisë Çlirimtare të Kosovës, Ramush Haradinaj, aktualisht kryetar i Aleancës për Ardhmërinë e Kosovës u lirua të enjten me kusht nga paraburgimi, me kërkesën që të mos largohet nga Franca deri në vendimin e radhës të gjykatës.
Haradinaj u ndalua javën e kaluar në aeroportin e Baselit, nga autoritetet franceze në bazë të një urdhërarresti të vjetër të Serbisë.