Ballina Sport Të ardhurat faraonike të Cristiano Ronaldos

Të ardhurat faraonike të Cristiano Ronaldos

Cristiano Ronaldo nuk është vetëm një prej futbollistëve më të mëdhenj në histori, por edhe një markë. Përfitimet e yllit portugez arrijnë shifra kolosale dhe vazhdojnë të shtohen. Një prej tyre është firma në zgjatjen e kontratës me Realin e Madridit deri në vitin 2021, nga e cila do të përfitojë 24 milionë euro në sezon. Plot 100 milionë euro për luzitanin në 5 vitet e ardhshëm vetëm nga Reali i Madridit.
Por, sikur kjo të mos mjaftonte, të ardhurave të 31-vjeçarit u shtohen edhe nga kontrata e re e firmosur me “Nike”. Bëhet fjalë për një marrëveshje me vlerë 24 milionë euro në vit edhe me sponsorin teknik, që i rrit në thuajse 50 milionë euro përfitimet sezonale të sulmuesit.
Megjithatë, edhe kjo shifër nuk mund të mjaftojë për Cristiano Ronaldon. Duke qenë një yll i sportit botëror, që ka mbi 250 milionë ndjekës në rrjetet sociale, kompanitë më të mëdha vazhdojnë ta kërkojnë imazhin e portugezit.
Kjo bën që në llogarinë bankare të ylli të Realit të shtohen edhe 40 milionë euro të tjera për 5-vjeçarin e ardhshëm, përpos atyre që i garantohen nga kontrata e përjetshme me “Nike”. Kompania gjigante e pajisjeve sportive firmosi me CR7 një kontratë si ajo e Michael Jordan.
Një rekord përfitimesh i paprecedent, sepse falë arritjeve sportive të dekadës së fundit, luzitani do të përfitojë 24 milionë euro në vit nga “Nike”, me vlerën që sipas përllogaritjeve arrin shifrën e 500 milionë eurove deri në fund të jetës. Përfitime marramendëse për një emër pa rivalë në botën e sportit.

Exit mobile version