Të shtëna me breshëri arme në Vlorë, panik tek qytetarët

Qyteti i Vlorës është tronditur mbrëmë nga të shtënat me breshëri armësh. Bëhet e ditur se ngjarja ka ndodhur rreth orës 18:40 në zonën e “Kalit të Trojës” në Vlorë pas një konflikti në një pikë bastesh. Persona të paidentifikuar ende kanë qëlluar me breshëri arme, duke shkaktuar panik tek banorët. Fatmirësisht nuk ka persona të lënduar, ndërsa policia ka shkuar menjëherë në vendgjarje dhe bëri të ditur se, ka nisur hetimet për të zbardhur plotësisht këtë ngjarje.
Sipas dëshmitarëve në vendngjarje është qëlluar dy herë me breshëri, gjë që ka shkaktuar panik te banorët. Në vendngjarje kanë mbërritur forcat e policisë, dy persona janë konfliktuar me njëri-tjetrin e më pas kanë shtënë në ajër me armë zjarri. Të dy personat e përfshirë në konflikt janë larguar nga vendngjarja, por vetëm pak minuta më pas, policia ka mundur të ndalojë njërin prej tyre.
Burimet bëjnë të ditur se, gjithçka ka nisur dy ditë më parë. Personi që qëlloi me armë zjarri kishte patur një konflikt me truprojën e një lokali në vendin e quajtur “Kali i Trojës”. Ditën e djeshme, ai ka tentuar të hakmerret duke shkuar me mjetin e tij drejt lokalit dhe i armatosur me automatik. Pasi ka gjetur truprojën, agresori ka qëlluar dy herë me breshëri në ajër, mirëpo për shkak se zona ishte mjaft e populluar është përhapur panik.
Agresori ka marrë mjetin dhe është larguar menjëherë nga vendngjarja. Mësohet se ai është identifikuar pasi mjetin e tij e ka braktisur disa metra më larg. Policia vijon kërkimet për kapjen e tij dhe për zbulimin e motiveve të sherrit.