Balaj, Roshi dhe Berisha, në formacionin e javës në Rusi

Tre shqiptarë në formacionin e javës në Premier Leaguen e Rusisë. Bekim Balaj, Odise Roshi dhe Bernard Berisha, falë paraqitjeve të shkëlqyera në javën e 12-të, janë përfshirë në 11-shen më të mirë, duke marrë vlerësimet maksimale nga specialistët e futbollit rus.
Balaj autor i një dygolëshi në fitoren 1-4 të Terek Groznit në fushën e Uralit, u vlerësua me notën e lartë 8.3, ndërsa Roshi i cili dha asistin për shkodranin në rastin e golit të dytë, si dhe detyroi mbrojtësin Dinga të shënone në portën e tij mori notën 7.6.
Dy futbollistët e kombëtares shqiptare ishin të vetmit lojtarë të Terek Groznit në formacionin e javës në Rusi. Sa i përket Bernard Berishës, i cili qëndroi 60 minuta në fushë në sfidën Anzhi–Krasnodar 0-0 duke dhënë maksimumin në krahun e majtë, vlerësimi ishte 7.7.
Interesant është fakti se edhe pak ditë më parë Balaj dhe Berisha ishin përzgjedhur në formacionin më të mirë të javës së 11-të në Premier Leaguen e Rusisë. Të tre lojtarët shqiptarë duket se janë përshtatur më së miri në futbollin rus, çka reflektohet me golat e shënuar dhe nivelin e lartë që shfaqin në fushën e blertë.